بۇگىن، 26 ساۋىردە نۇر-سۇلتان قالاسىنىڭ № 9 ەمحاناسىندا دەنساۋلىق ساقتاۋ ءمينيسترى الەكسەي سوي كۆي-عا قارسى قازاقستاندىق QazCovid-in (QAZVAC) ۆاكسيناسىن سالدىردى.

دەنساۋلىق ساقتاۋ مينيسترىگىنىڭ مالىمەتىنشە، ۆاكسينانى سالار الدىندا مەديسينا قىزمەتكەرى بۇل ەكى دوزالى ۆاكسينا ەكەنىن جانە ءبىر بوتەلكە ءبىر ادامعا ارنالعانىن، سونىمەن قاتار وتاندىق ۆاكسينا مۇزداتۋدى قاجەت ەتپەيتىنىن، پليۋس 2-دەن 8 گرادۋسقا دەيىنگى تەمپەراتۋرادا ساقتالاتىنىن ايتقان.

بۇدان ءارى مينيستر جۋرناليستكە بەرگەن سۇحباتىندا قازاقستاندىق ۆاكسينانىڭ العاشقى پارتياسى بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى بازاسىندا 50 مىڭ دوزا كولەمىندە شىعارىلعانىن جانە ءقازىردىڭ وزىندە وڭىرلەر بويىنشا تاراتىلىپ جاتقانىن حابارلادى.

– ءبىز ۆاكسينالار ءوندىرىسىن ىسكە قوسقان جانە ۆاكسينالاردى شىعارۋدىڭ تولىق سيكلىن – ازىرلەۋدەن باستاپ قولدانۋعا دەيىن ءوز بەتىنشە يگەرگەن الەمنىڭ ون ەلىنىڭ قاتارىنا كىرۋدەمىز، بۇل – ۇلكەن جەتىستىك. قاراعاندىلىق فارمازاۆود ۆاكسينالاردىڭ نەگىزگى پارتيالارىن قوسىمشا وندىرەدى، نارىقتى قانىقتىرادى، ول ءبىزدىڭ ازاماتتارىمىزعا زاماناۋي پرەپاراتتارعا قول جەتكىزۋگە مۇمكىندىك بەرەدى، – دەپ اتاپ ءوتتى الەكسەي سوي ۆاكسيناسيادان كەيىن.

"سق-فارماسيا" ءبىرىڭعاي ديستريبيۋتورىنىڭ حابتارىنا 50 مىڭ دوزا كولەمىندە وتاندىق ۆاكسينانىڭ ءبىرىنشى پارتياسىن جەتكىزۋ 23 ساۋىردە جۇزەگە اسىرىلدى. ونىڭ ىشىندە 6 000 دوزانى نۇر-سۇلتان مەن الماتى، 4 000 دوزادان – شىمكەنت، قاراعاندى، شىعىس قازاقستان جانە الماتى وبلىستارى الادى، قالعان وڭىرلەرگە ەكى مىڭ دوزادان تۇسەدى.