دەنساۋلىق ساقتاۋ ۆيسە-مينيسترى اجار عينيات كوروناۆيرۋسقا قارسى ەكپەنىڭ 2 كومپونەنتىن العاندارعا قوسىمشا قانداي مۇمكىندىكتەر بەرىلەتىنىن ايتتى. بۇل تۋرالى ول ورتالىق كوممۋنيكاسيالار الاڭىندا وتكەن بريفينگتە مالىمدەدى.

– ەكى كومپونەنتتى العان ادامداردان شەت مەملەكەتتەن كەلگەندە تەست تالاپ ەتىلمەيدى. سونداي-اق اۋىسىمدىق جۇمىس ىستەيتىندەرگە جانە جۇمىسقا شىعاردا نەمەسە كەزەكتى ەڭبەك دەمالىسىنان قايتقاندا، اۋرۋحاناعا جاتقاندا پتر تەست تاپسىرمايدى، – دەدى ا. عينيات.

سونداي-اق ۆيسە-مينيستر ۆاكسينالاردىڭ ەكىنشى كومپونەنتىن قاي ۋاقىت ارالىعىندا قابىلداۋ قاجەتتىگىن ءتۇسىندىردى.

– ەلىمىزدە 3 ۆاكسينا قولدانىستا. ءبىرىنشى ۆاكسينا – رەسەيلىك "سپۋتنيك V". بۇرىن 21 كۇننەن كەيىن ەكىنشى كومپونەنتىن الاتىن، ءقازىر وندىرۋشىلەردىڭ كەڭەسىنە بايلانىستى ەكىنشى كومپونەنتىن الۋ 45 كۇنگە دەيىن سوزىلدى. ەگەر ءبىرىنشى كومپونەنتىن العان ادام 21ء-شى كۇنى نەمەسە 45ء-شى كۇنگە دەيىن الاتىن ويى بولسا، دارىگەرمەن اقىلداسىپ، الا الادى. بۇگىندە بۇل ۆاكسينانىڭ ەلىمىزدە ەكىنشى كومپونەنتى جەتكىلىكتى.

ەكىنشى ۆاكسينا – جۇڭگو مەن بىرىككەن اراب امىرلىكتەرى شىعارعان "Hayat-Vax". بۇل ۆاكسينانىڭ ەكىنشى كومپونەنتىن 2 نەمەسە 4 اپتادان كەيىن الۋعا بولادى. 

ءۇشىنشى ۆاكسينا – وتاندىق "QazVac". ۆاكسينانىڭ ەكىنشى كومپونەنتى 21ء-شى كۇنى ەگىلەدى، –  دەپ جاۋاپ بەردى ۆيسە-مينيستر.