سىرتقى ىستەر ءمينيسترى مۇحتار تىلەۋبەردى ماجىلىستەگى "Nur Otan" پارتياسى فراكسيا مۇشەلەرىنىڭ وڭتۇستىك كورەياداعى قازاقستاندىقتاردىڭ زاڭدى ەڭبەك ەتۋ مۇمكىندىگىن پىسىقتاۋ ماسەلەسىنە بايلانىستى ساۋالىنا جاۋاپ بەردى.
مينيستر جاۋابىندا 2020 جىلعى 31 جەلتوقسانداعى جاعداي بويىنشا وڭتۇستىك كورەيا اۋماعىندا 8902 قازاقستاندىق زاڭسىز ەڭبەك ميگرانتتارى رەتىندە جۇرگەنى ايتىلادى.
ونىڭ ايتۋىنشا، كورەيا رەسپۋبليكاسىنىڭ شەتەلدىك ەڭبەك كۇشتەرىن ماۋسىمدىق جۇمىسقا تارتۋ باعدارلاماسىنا (The Seasonal Worker) سايكەس، قازاقستان ازاماتتارىن وڭتۇستىك كورەيانىڭ اۋىل جانە بالىق شارۋاشىلىعى سالاسىنا ماۋسىمدىق جۇمىستارعا تارتۋ جونىندەگى ۇسىنىستى وسى ەلدىڭ ءتيىستى مەكەمەلەرى مەن جەرگىلىكتى پروۆينسيالارىنىڭ اكىمشىلىگى ىسكە اسىرۋعا قىزىعۋشىلىق تانىتپاعان. بۇعان "Covid-2019" ىندەتىنىڭ ورشۋىنە بايلانىستى ەنگىزىلگەن كارانتين شەكتەۋلەرى مەن قازاقستاندىقتاردىڭ كاسىپتىك يكەمدىلىگى اتالعان باعدارلاماعا ەنگىزىلگەن سالالارعا (تەڭىز بالىق شارۋاشىلىعى، كۇرىش ءوندىرۋ سالاسى جانە ت.ب.) ساي كەلمەۋى سەبەپ بولعان.
– 2020 جىلعى 25-26 قاراشا ارالىعىندا سەۋل قالاسىندا "ورتالىق ازيا – كورەيا رەسپۋبليكاسى" ىنتىماقتاستىق فورۋمىنىڭ 13ء-شى وتىرىسى اياسىندا وڭتۇستىك كورەيا سىرتقى ىستەر مينيسترىمەن بولعان كەلىسسوزدەر بارىسىندا كورەيالىق ەmployment Permit System – EPS ("ەڭبەك رۇقساتتارى جۇيەسى" - ەرج) شەتەلدىكتەردى جۇمىسقا ورنالاستىرۋ جۇيەسىنە قوسىلۋ ماسەلەسىن كوتەردىم جانە كورەي تاراپى وعان جالپى قارسىلىق بىلدىرمەدى. اتالعان ەرج-گە قوسىلۋ ءۇشىن كورەيانىڭ جاۋاپتى مەملەكەتتىك مەكەمەلەرى ق ر ءتيىستى مەملەكەتتىك ورگانىمەن جۇمىس كۇشىن جالداۋ تۋرالى نەگىزدەمەلىك كەلىسىم جاساۋعا ءتيىس. كورەيالىق تاراپتىڭ نەگىزگى تالابى – قازاقستان وڭتۇستىك كورەياعا ەڭبەك ميگرانتتارىن جىبەرۋمەن اينالىساتىن ارنايى مەملەكەتتىك مەكەمە قۇرۋى قاجەت، – دەدى ول.
قازىرگى تاڭدا جول كارتاسى ازىرلەنىپ جاتىر، وعان ساي ەڭبەكمين جانىنان كوشى-قون كوميتەتى قۇرىلماق. الايدا بۇل قازاقستاندىق ەڭبەك ميگرانتتارىنىڭ ماسەلەسىن تۇبەگەيلى شەشپەيدى، ويتكەنى، جۇيەگە قوسىلعان جاعدايدا ازاماتتاردىڭ ءبىر بولىگى عانا ەڭبەك كەلىسىمى بويىنشا رەسمي تۇردە جۇمىس ىستەيتىن بولادى. قازىرگى ۋاقىتتا وسىنداي كەلىسىمدەر كورەيا رەسپۋبليكاسىمەن 16 ەل اراسىندا جاسالعان. جۇيە بويىنشا جىل سايىنعى بولىنەتىن جالپى كۆوتا 50 مىڭ ورىن بولسا، ءار ەلگە بولىنەتىن ورىن سانى 3 مىڭ شاماسىندا ەكەنى كورسەتىلگەن.
سونداي-اق كورەيادا ەل كىرۋگە ەلەكتروندىق رۇقسات بەرۋدى كوزدەيتىن پيلوتتىق جوبا ىسكە قوسىلماق. وعان سايكەس، تۋريستەر الدىن الا "IOS" جانە "Google Play" موبيلدىك قۇرىلعىلارىنا ارنالعان قوسىمشالار نەمەسە ۆەب-سايت ارقىلى جەكە جانە جۇمىس ساپارىنا قاتىستى اقپاراتتى ۇسىنادى. ال بۇل ءوز كەزەگىندە ەڭبەك ميگرانتتارى اعىنىن ازايپاق.
پىكىر قالدىرۋ