باۋىرجان بايبەك پەن جانبولات ماماي سوتتا تاتۋلاسا المادى. بۇل تۋرالى بايبەكتىڭ وكىلى ايجان تاشەنوۆا ايتتى.

«بۇگىن سوت تاتۋلاستىرۋ ءراسىمى اياسىندا ب.بايبەكتىڭ ج.ماماي مەن ي.يمانبايەۆاعا قاتىستى تالاپ ارىزى بويىنشا جاۋاپكەرلەردىڭ قاتىسۋىمەن ونلاين-اڭگىمەلەسۋ وتكىزدى.

زاڭعا سايكەس مەدياسيا – ازاماتتىق پروسەسس اياسىندا وتكىزىلۋى مىندەتتى تالاپ ارىز ءوندىرىسىنىڭ اجىراماس بولىگى ەكەندىگىن اتاپ وتكىم كەلەدى. بۇل تالاپ ازاماتتىق ءىس جۇرگىزۋ كودەكسىنىڭ 150 جانە 174-باپتارىندا بەلگىلەنگەن. ياعني، سوتتىڭ ءوزى تاتۋلاستىرۋ ءراسىمىن ۇيىمداستىرادى جانە تاراپتارعا داۋدى شەشۋگە مۇمكىندىك بەرەدى.

اڭگىمەلەسۋ بارىسىندا سۋديا ا.وتەپوۆا وسى ءراسىمنىڭ ەرىكتىلىگىن اتاپ ءوتىپ، تاراپتارعا داۋدى تاتۋلاسۋ ارقىلى شەشۋ قۇقىعىن ءتۇسىندىردى.

تاتۋلاسۋ مۇمكىندىگى مەن شارتتارى تۋرالى ءبىزدىڭ ۇستانىمىمىزدى مەن كەشەگى پوستتا ايتقان بولاتىنمىن. سوتتا مەن تالاپتارىمىزدى راستادىم.

ج. ماماي ءوز سوزىندە الدىنداعى نەگىزسىز اقپارات تاراتاتىن بارلىق ماتەريالدارىنداعىداي، سوت تالقىلاۋىنا قاتىسى جوق ماسەلەلەر بويىنشا اڭگىمە جۇرگىزۋگە تىرىسىپ، تالاپ ارىزدا مالىمدەلگەن جايتتەرگە جاناسپايتىن باسقا دۇنيەلەردى ايتىپ كەتتى. جاۋاپكەرلەر تاتۋلاسۋدان باس تارتتى.
كونسترۋكتيۆتى ديالوگتىڭ بولماۋىنا، سونداي-اق جاۋاپكەرلەردىڭ تاتۋلاسۋ بويىنشا ۇسىنىلعان شارتتاردان باس تارتۋىنا بايلانىستى سۋديا ا.وتەپوۆا اڭگىمەلەسۋدى توقتاتۋ تۋرالى شەشىم قابىلدادى.

تاعى دا ەستەرىڭىزگە سالا كەتەيىن، سوت – جالاڭ مالىمدەمەلەر جاساپ، اسىرەساياساتشىلدىقپەن اينالىسىپ، دولبارلار ايتۋعا ارنالعان مىنبەر ەمەس. سوتتا تاراپتار مالىمدەمەلەرىن راستايتىن دالەلدەمەلەردى مىندەتتى تۇردە ۇسىنا وتىرىپ، تەك داۋدىڭ مانىنە قاتىسى بار جاعداياتتار تۋرالى عانا تۇسىنىكتەمە بەرۋگە قۇقىلى.

بۇدان ءارى ازاماتتىق ءىس جۇرگىزۋ كودەكسىنە سايكەس تالاپ ارىز بەرىلگەن كۇننەن باستاپ 10 جۇمىس كۇنى ىشىندە، ياعني 30 ساۋىردەن باستاپ سوت تالاپ ارىزدى ءمانى بويىنشا قاراۋ ءۇشىن وندىرىسكە قابىلداۋ تۋرالى شەشىم قابىلدايدى.

جۇرتشىلىقتى ءىستىڭ بارىسى تۋرالى ءارى قاراي دا وبەكتيۆتى تۇردە حاباردار ەتىپ وتىرامىن»، - دەپ جازدى زاڭگەر.