الماتى وبلىسى جاركەنت قالاسىنىڭ اكىمى بولات وماروۆ بەلسەندىلەردى قولداۋعا شىققان كولىك جۇرگىزۋشىلەرىنە دورەكى سويلەگەنى ءۇشىن تارتىپتىك جاۋاپكەرشىلىككە تارتىلدى. بۇل تۋرالى 24.kz ارناسى حابارلادى.
مەملەكەتتىك قىزمەت ىستەرى اگەنتتىگىنىڭ الماتى وبلىسى بويىنشا دەپارتامەنتى الەۋمەتتىك جەلىلەرگە مونيتورينگ جۇرگىزۋ بارىسىندا جاركەنت قالاسىنىڭ اكىمى وماروۆقا قاتىستى ۆيدەولاردى انىقتاعان. سول بويىنشا دەپارتامەنت ءتيىستى شارالار قابىلداۋ ءۇشىن الماتى وبلىسى اكىمىنىڭ اپپاراتىنا حات جولدادى.
"الماتى وبلىسى اكىمى اپپاراتىنىڭ ادەپ جونىندەگى ۋاكىلىنىڭ 2021 جىلعى 5 مامىرداعى جاۋابىنا سايكەس، پانفيلوۆ اۋدانى اكىمىنىڭ 2021 جىلعى 28 ساۋىردەگى № 70 وكىمىمەن ب.ش. وماروۆ بۇزۋشىلىقتار ءۇشىن قاتاڭ سوگىس تۇرىندە تارتىپتىك جاۋاپقا تارتىلعانى انىقتالدى" دەلىنگەن حابارلامادا.
ەسكە سالا كەتەيىك، 22 ساۋىردە "قورعاس" شەكارا ماڭى ىنتىماقتاستىعى حالىقارالىق ورتالىعىنداعى Nur joly ستانساسىندا ەكى جۇك كولىگىنىڭ جۇرگىزۋشىسى زاڭبۇزۋشىلىقتار جاساپ، قاماۋعا الىنعان. شەكارا اۋماعىندا كەزەكتە تۇرعان 100-گە جۋىق جۇك كولىگىنىڭ جۇرگىزۋشىسى پانفيلوۆ اۋداندىق پوليسيا ءبولىمىنىڭ الدىنا جينالىپ، ارىپتەستەرىن بوساتۋدى تالاپ ەتكەن. الەۋمەتتىك جەلىدە تاراعان ۆيدەودان جينالعانداردى تاراۋعا شاقىرۋعا كەلگەن اكىم جۇرگىزۋشىلەرگە دورەكى سويلەپ، بەيادەپ سوزدەر ايتقانىن كورۋگە بولادى.
ۆيدەودا اكىم نارازىلىققا شىققان جۇرگىزۋشىلەرمەن كەزدەسىپ، ولارعا "سەن" دەپ سويلەپ، قايتۋعا شاقىرادى. كەيىن جينالعانداردىڭ ءبىرى "اكىم مىرزا ءسىزدى حالىق سايلادى عوي، ءبارىن جايلاپ ءتۇسىندىرىپ بەرسەڭىزشى" دەگەندە، "مەنى سەن سايلاعان جوقسىڭ" دەپ جاۋاپ بەرگەن.
پىكىر قالدىرۋ