بايبەكتىڭ تالاپ-ارىزى: ماماي «ونىڭ مازمۇنىمەن تانىس بولماسا دا» ساراپتاما قورىتىندىلارىمەن كەلىسپەيتىنىن مالىمدەدى. بۇل تۋرالى باۋىرجان بايبەكتىڭ وكىلى ءوزىنىڭ الەۋمەتتىك جەلىدەگى پاراقشاسىندا جازدى.

«قۇرمەتتى دوستار!
ب.بايبەكتىڭ ج.ماماي مەن ي.يمانبايەۆاعا قاتىستى بەرگەن تالاپ ارىزىنا سايكەس ازاماتتىق ءىس بويىنشا سۋديا ر. سارتايەۆا 2021 جىلعى 11 مامىردا ازاماتتىق ءىس قوزعاۋ تۋرالى ۇيعارىم شىعاردى.
بۇگىن ونلاين-رەجيمدە سوت تالقىلاۋىنا دايىندىق باستالدى. ايتا كەتۋ كەرەك، بۇل – ازاماتتىق پروسەستىڭ مىندەتتى كەزەڭى.

وسىعان بايلانىستى كەلەسى جايتتەردى نازارلارىڭىزعا ۇسىنامىن.
بىرىنشىدەن، سوت تالاپ قويۋشىنىڭ، ياعني ب.بايبەكتىڭ تالاپ قويۋى كەزىندە تالاپ ارىز بەرۋ نىسانى مەن مازمۇنى، سونداي-اق تالاپ ارىزعا قوسا بەرىلگەن قۇجاتتار بويىنشا ازاماتتىق ءىس جۇرگىزۋ كودەكسىنىڭ 148 جانە 149-باپتارىنىڭ بارلىق تالاپتارى ساقتالعانىن انىقتادى.

ياعني، ءبىز ۇسىنعان ماتەريالداردى سوت ءىس قوزعاۋ ءۇشىن جەتكىلىكتى دەپ تانىدى. سوندىقتان دا جەكەلەگەن الەۋمەتتىك جەلىلەردى پايدالانۋشىلاردىڭ تالاپ ارىزدىڭ ءتيىستى تالاپتارعا سايكەس كەلمەيدى دەگەن ۋاجدەرى مۇلدەم نەگىزسىز.

ەكىنشىدەن، بۇگىن سوت ج.ماماي مەن ي.يمانبايەۆانى تالاپكەردىڭ تاراپىنا ايتىلعان ايىپتاۋلارىنا جازباشا دالەلدەر (پىكىر) ۇسىنۋعا مىندەتتەدى.

بۇل رەتتە، سوت ناقتى قۇجاتتارمەن راستالعان پىكىر ۇسىنىلماعان جاعدايدا ءىس قولدا بار دالەلدەمەلەر بويىنشا قارالاتىنىن ءتۇسىندىردى.

ەستەرىڭىزگە سالا كەتەيىن، ءبىز تالاپ ارىزدا 20-دان استام رەسمي قۇجاتقا، اكىمدىك قاۋلىلارىنا، كەلىسىمشارتتارعا جانە جاۋاپكەرلەردىڭ نەگىزسىز مالىمدەمەلەرىن جوققا شىعاراتىن وزگە دە ماتەريالدارعا سىلتەمە جاسادىق.

وسى ورايدا زاڭناماعا سايكەس دالەلدەردىڭ بولماۋى جاۋاپكەرشىلىكتەن بوساتپايتىنا نازار اۋدارتقىم كەلەدى.

بۇگىن وتىرىس بارىسىندا بەلگىلى بولعانداي، جاۋاپكەرلەر وزدەرى تۋدىرعان جاعدايدىڭ اۋىرتپالىعىن العاش رەت ءتۇسىنىپ، بىرنەشە كۇن بۇرىن عانا ادۆوكاتتار جالداعان.

ج.ماماي مەن ي.يمانبايەۆانىڭ ادۆوكاتتارى تالاپ ارىزدى تالقىلاۋعا دايىن بولماۋىنا بايلانىستى تالاپ قويۋمەن جانە وعان قوسا بەرىلەتىن ماتەريالدارمەن تانىسۋعا ۋاقىت بەرۋ تۋرالى سوتقا وتىنىشپەن جۇگىندى.

بۇل رەتتە ي.يمانبايەۆانىڭ ادۆوكاتى وسىعان دەيىن جاريا ەتىلگەن ايىپتاۋلار بويىنشا دالەلدەمەلەر جيناۋ ەندى عانا باستالعانىن حابارلادى. ا.ءتۇسىپوۆانىڭ سوتقا جۇگىنگەن سوزدەرىن كەلتىرىپ وتەيىن: «ءسىز بىزگە ۇسىناتىن مەرزىمدەر جەتكىلىكتى دالەلدەر جيناۋ كەزىندە ءبىزدىڭ قۇقىقتارىمىزعا نۇقسان كەلتىرەدى دەپ قورقامىن».

وسىلايشا، ج.ماماي مەن ي.يمانبايەۆا الدىمەن ب.بايبەككە قاتىستى جالعان ايىپتاۋلاردان تۇراتىن مالىمدەمەلەردى جاريا ەتىپ، ولاردى ءتۇرلى بەينەماتەريالداردا قايتالاپ جانە بىرنەشە رەت تاراتا وتىرىپ، قاجەتتى دالەلدەر مەن فاكتىلەردى ىزدەۋگە ەندى عانا كىرىسكەنى اڭعارىلادى.

ۇشىنشىدەن، ءبىز قۇقىعىمىزدى پايدالانا وتىرىپ، ج.ماماي مەن ي.يمانبايەۆا ايىپتاۋلارىنا تاۋەلسىز پسيحولوگيالىق-فيلولوگيالىق ساراپتاما جۇرگىزدىك، ونىڭ ناتيجەلەرىن الەۋمەتتىك جەلىلەردە 30 ساۋىردە جاريالادىق.

ال جاۋاپكەرلەر وتىرىس بارىسىندا «ونىڭ مازمۇنىمەن تانىس بولماسا دا» ساراپتامانىڭ قورىتىندىلارىمەن كەلىسپەيتىنىن مالىمدەدى.

تورتىنشىدەن، سوت پروسەسى قارالاتىن ءتىلدى انىقتاۋعا جەكە تۇسىنىكتەمە بەرىپ وتكىم كەلەدى.

ج.ماماي مەن ي.يمانبايەۆا 13 ساۋىردە وزدەرىنىڭ «جۋرناليستىك زەرتتەۋ» دەپ اتالاتىن ماتەريالدارىن ورىس تىلىندە، سودان كەيىن بارىپ ونىڭ قازاق تىلىنە اۋدارماسىن جاريالاعانىن ەسكەرە وتىرىپ، ب.بايبەك تە ورىس تىلىندە 19 ساۋىردە جاريا تۇردە بارلىق ايىپتاۋلاردى جوققا شىعاردى.

تيىسىنشە، تالاپ ارىز ورىس تىلىندە بەرىلدى. سوت شەشىمىمەن ءىستى جۇرگىزۋ ءتىلى بولىپ ورىس ءتىلى انىقتالدى.
زاڭعا سايكەس تاراپتار سوت ۇسىناتىن اۋدارماشىعا جۇگىنۋگە قۇقىلى ەكەنىن اتاپ وتكىم كەلەدى.

قورىتا ايتقاندا، ج.ماماي مەن ي.يمانبايەۆا ادۆوكاتتارىنىڭ ءوتىنىشىن ەسكەرە وتىرىپ، سوت 17 مامىردى ءىستىڭ ماتەريالدارىمەن تانىسۋ كۇنى، ال 19 مامىردى – قايتا وتىرىستى وتكىزۋ كۇنى دەپ بەلگىلەدى.

تاعى دا ەستەرىڭىزگە سالا كەتەيىن، سوت – زاڭ ۇستەمدىك قۇراتىن، تەڭ قۇقىقتى ەكى تاراپتىڭ اشىق تارتىسى بارىسىندا ناقتى دالەلدەردى كەلتىرەتىن ورىن ەكەندىگىن اتاپ وتكىم كەلەدى. كەلەسى وتىرىستا جاۋاپكەرلەر قانداي-دا ءبىر دالەلدەمەلەر ۇسىنادى نەمەسە دالەلدەرى جوق ەكەندىگىن مويىندايدى دەپ ۇمىتتەنەمىن.

سىزدەردى سوت تالقىلاۋى بارىسى تۋرالى ءارى قاراي دا حاباردار ەتىپ وتىرامىن»، - دەپ جازدى زاڭگەر.