باۋىرجان بايبەكتىڭ وكىلى ايجان تاشەنوۆا ءوزىنىڭ الەۋمەتتىك جەلىدەگى پاراقشاسىندا بۇگىن وتكەن بايبەك-ماماي سوتىنىڭ بارىسى تۋرالى جازدى.

"بۇگىن ب. بايبەكتىڭ تالاپ ارىزى بويىنشا سوت پروسەسىنە دايىندىق اياسىندا ەكىنشى وتىرىس ءوتتى.

وسى ورايدا ءبىرقاتار ماڭىزدى جايتتەرگە نازار اۋدارتقىم كەلەدى.
وسىدان ءبىر اي بۇرىن، ياعني 19 ساۋىردە باۋىرجان بايبەك ءوز سۇحباتىندا ج. ماماي مەن ي. يمانبايەۆانىڭ ەشقانداي نەگىزسىز، ءبىرىڭعاي وتىرىك پەن دولبارعا قۇرىلعان ايىپتاۋلارىنا ناقتى ءارى دالەلدى جاۋاپ بەرگەن بولاتىن. سول سۇحباتىندا ول ءوز ار-نامىسى مەن قادىر-قاسيەتىن قورعاۋ ماقساتىندا سوتقا جۇگىنەتىنىن دە جاريا تۇردە مالىمدەدى. ب. بايبەكتىڭ وسى سۇحباتى شىن مانىندە ءبىزدىڭ سوتتاعى قۇقىقتىق پوزيسيامىزدىڭ نەگىزىنە اينالدى.

وسىعان بايلانىستى 26 ساۋىردە مەن رەسمي وكىل رەتىندە جاۋاپكەرلەردىڭ ەشقانداي نەگىزسىز تاققان ايىپتاۋلارىن تەرىسكە شىعاراتىن قۇجاتتاردىڭ تولىق پاكەتىن (اكىمدىكتىڭ 20-دان اسا رەسمي قاۋلىلارى، كەلىسىمشارتتار مەن وزگە دە ماتەريالدار) الدىم. سونىمەن قاتار مەن قولجەتىمدى اقپاراتتارعا دا ەكسپرەسس-تالداۋ جۇرگىزدىم. ناتيجەسىندە مەن تالاپ ارىزدى اشىق دەرەككوزدەردەن الىنعان تالاپكەر تالابىنىڭ دۇرىستىعىن مۇلتىكسىز راستايتىن فاكتىلەرمەن تولىقتىردىم.
ياعني مەن دەرەكتەرگە جاسالعان قاراپايىم فاكچەكينگتىڭ ءوزى وپپونەنتتەردىڭ جالعان تۇجىرىمدارىن تولىقتاي جوققا شىعارادى جانە ب.بايبەك قىزمەت ەتكەن كەزەڭدەگى اكىمدىك شەشىمدەرى تەك مەملەكەت پەن قوعام مۇددەسى تۇرعىسىنان قابىلدانعانىن راستايدى دەپ سەنىمدى تۇردە مالىمدەي الامىن.

سوندىقتان مەن ب.بايبەكتەن سەنىمحات العان ساتتەن باستاپ 4 كۇن ىشىندە تالاپ ارىز دايىنداپ 30 ساۋىردە ونى تاۋەلسىز پسيحولوگيالىق-فيلولوگيالىق ساراپتاما قورىتىندىلارىمەن بىرگە سوتقا جولدادىم.

ەسكە سالا كەتەيىن، ازاماتتىق ءىس جۇرگىزۋ كودەكسىنە سايكەس تالاپ قويۋشى، ياعني ب.بايبەك ءوز تالاپتارىن دالەلدەۋگە مىندەتتى ەمەس، كەرىسىنشە تەك جاۋاپكەرلەر عانا سوتقا ءوز ايىپتاۋلارىن راستايتىن دالەلدەمەلەر ۇسىنۋعا ءتيىس.

ءىستىڭ رەزونانس تۋدىراتىنىن جانە ج.ماماي مەن ي.يمانبايەۆانىڭ ۇدايى فاكتىلەردى بۇرمالاۋعا ارەكەت ەتەتىنىن ەسكەرە وتىرىپ، مەن بارلىق مۇددەلى تۇلعالاردىڭ تانىسۋى ءۇشىن تالاپ ارىز بەن ساراپتامانى سالا وتىرىپ، پوست جاريالادىم. بۇعان قوسا، جاۋاپكەرلەردىڭ الەۋمەتتىك جەلىلەردەگى دەسترۋكتيۆتى بەلسەندىلىگىن كورە وتىرىپ، مەن ولاردى تالاپ ارىز بەرگەن كۇنى ارنايى تەگتەدىم.
وسىعان قاراماستان، ءبىرىنشى وتىرىستا جاۋاپكەرلەر مەن ولاردىڭ ادۆوكاتتارى «تالاپ ارىز بەن ساراپتامانىڭ ءمانىن تالقىلاۋعا دايىن ەمەستىگىن» مالىمدەپ، سوتتان «ءىس ماتەريالدارىن زەردەلەۋگە»، ءبىر قىزىعى، «دالەلدەمەلەر جيناۋعا» قوسىمشا ۋاقىت بەرۋدى سۇرادى.

ايتسە دە جاۋاپكەرلەردىڭ كوپتەگەن ار-نامىسقا تيەتىن، قورقىتىپ-ۇركىتەتىن جانە جالاڭ ايىپتاۋلار دايىنداپ، الەۋەتتىك جەلىلەر مەن بۇقارالىق اقپارات قۇرالدارىندا ورنالاستىرۋعا ۋاقىتى جەتكىلىكتى ەكەنىن اتاپ وتكەن ءجون.

حالىقارالىق قۇقىقتى زەرتتەگەن زاڭگەر رەتىندە ءجۋرناليستىڭ كاسىپتىك ەتيكاسىنىڭ حالىقارالىق قاعيداتتارىنىڭ ەرەجەسىنە سايكەس «ب ا ق وكىلدەرىنىڭ باستى مىندەتى – وبەكتيۆتى ناقتىلىق ارقىلى ادامداردىڭ راستالعان جانە شىنايى اقپارات الۋىنا كەپىلدىك بەرۋ (قاعيدات – ءجۋرناليستىڭ وبەكتيۆتى اقپاراتقا ادالدىعى) ەكەنىن اتاپ وتكىم كەلەدى.

وزدەرى ايتىپ جۇرگەندەي، جۋرناليستيكا سالاسىندا 10 جىلدان ارتىق جۇمىس ىستەگەن مامان، بۇرىنعى باس رەداكتورلار رەتىندە ج.ماماي مەن ي.يمانبايەۆا مۇنى جاقسى بىلسە كەرەك. كەز كەلگەن اقپارات، ونىڭ ۇستىنە جاريالانىمعا وزەك ەتىپ الىنىپ وتىرعان سالماقتى ايىپتاۋ ناقتى فاكتىلەر مەن قۇجاتتارعا نەگىزدەلىپ، شىنايى دەرەك كوزىنە سىلتەمەسى بولۋى ءتيىس.

ايتسە دە، جالا جابۋشى ۆيدەو جاريالانعاننان كەيىن وتكەن 36 كۇن ىشىندە «جۋرناليستىك زەرتتەۋ» دەپ اتالاتىن ايىپتاۋلارىن راستايتىن قۇجاتتاي دالەلدەمەلەر جاريالان جوق. جاۋاپكەرلەر مۇنى سوتقا عانا ەمەس، ءتىپتى ءوز ادۆوكاتتارىنا دا ۇسىنباعان. بۇل جايىندا ي.يمانبايەۆانىڭ ادۆوكاتى – ا.ءتۇسىپوۆا ءبىرىنشى وتىرىستا مالىمدەدى. سونىمەن قاتار ي.يمانبايەۆا 17 مامىردا «kz.media» پورتالىنا بەرگەن سۇحباتىندا قۇجاتتاي دالەلدەمەنىڭ بولماۋ فاكتىسىن، ياعني سوتتاعى جەڭىلىستى مويىندادى.

بۇگىنگى وتىرىستا سۋديا جاۋاپكەرلەرگە سوت تاعايىندايتىن پسيحولوگيالىق-فيلولوگيالىق ساراپتاما ءۇشىن سۇراقتار تۇجىرىمداۋ جايلى بىرنەشە رەت ءوتىنىش ايتتى. سوت ءىستى دايىنداۋ كەزىندە توقتاتا تۇرىپ، كەشەندى تاۋەلسىز سوت ساراپتاماسىن تاعايىنداۋ تۋرالى ۇيعارىم شىعاردى.

جالپى، وزدەرىنىڭ جالعان ايىپتاۋلارىنا قانداي دا ءبىر دالەلدەر جوق ەكەندىگىن ەسكەرە وتىرىپ سوت تالقىلاۋلارى بارىسىندا ج.ماماي مەن ي.يمانبايەۆا تالقىلاۋدى بارىنشا سوتقا قاتىسى جوق ماسەلەگە بۇرىپ اكەتۋگە تىرىسىپ، بارلىعىن ارزان قويىلىم مەن ساياسي فارسقا اينالدىرعىسى كەلەدى. مىسالى، باسىندا جاۋاپكەرلەر سوتقا نارازىلىق ءبىلدىرۋ، قارسى تالاپ ارىز بەرۋ تۋرالى مالىمدەپ، ودان ءارى قاراي قايتادان ب.بايبەكتىڭ تىكەلەي ءوزى قاتىسۋىن تالاپ ەتتى، سونىمەن قاتار كوپتەگەن ەكىنشى كەزەكتى سۇراقتار كوتەردى.

بۇل سوت پروسەسى ايگىلى بريتان جازۋشىسى دجوناتان ءسۆيفتتىڭ مىنا ءبىر قاناتتى ءسوزىن راستاي تۇسەدى: «قۇرتتاردىڭ نەگىزىنەن شىرىندى جەمىستەرگە ۇيمەلەيتىنى سەكىلدى، ادەتتە ابىرويلى ادامدارعا جالا جابىلادى».

سوندىقتان دا جاۋاپكەرلەردىڭ پروسەستى سوزۋعا جانۇشىرا تىرىسۋىنا قاراماستان، سوت بۇل ءىستى ءمانى بويىنشا زاڭدا بەلگىلەنگەن مەرزىمدە قاراپ، داۋعا ءادىل نۇكتەسىن قويادى دەپ ۇمىتتەنەمىن.

سىزدەردى تالقىلاۋ بارىسى تۋرالى ءارى قاراي دا حاباردار ەتىپ وتىرامىن" دەلىنگەن جازبادا.