ەۋروپالىق وداق مينسك جۋرناليست رومان پروتاسيەۆيچتى قاماۋعا الۋ وقيعاسىنان كەيىن بەلارۋستىڭ اۋە كومپانيالارىنا ەۋروپا اسپانىندا ۇشۋعا تىيىم سالۋ تۋرالى شەشىم قابىلدادى.
بريۋسسەلدەگى كەزدەسۋدە 27 مەملەكەت باسشىسى ەو اۆياكومپانيالارىنا بەلارۋس ۇستىنەن ۇشىپ وتپەۋدى بۇيىردى جانە ەكونوميكالىق سانكسيالاردىڭ ودان ءارى جالعاسۋىنا ۋادە بەردى.
ال اقش پرەزيدەنتى دجو بايدەن بەلارۋس بيلىگىنىڭ ارەكەتىن "شەكتەن شىققان" دەپ ايىپتاپ، بۇل "ساياسي كەلىسپەۋشىلىككە دە، باسپا ءسوز بوستاندىعىنا دا ۇيات شابۋىل" دەپ مالىمدەدى.
Ryanair ۇشاعى جەكسەنبىدە ەۋروپا وداعى ەلدەرىنىڭ ىشكى رەيسىن ورىنداۋ بارىسىندا گرەكيا استاناسى افينىدان لاتۆيا استاناسى ۆيلنيۋسكە ۇشىپ بارا جاتىپ، "بورتتا بومبا بار" دەگەن سەبەپپەن يسترەبيتەلدەردىڭ كومەگىمەن كۇشتەپ بەلارۋس استاناسى مينسككە قوندىرىلعان. ۇشاق قونىسىمەن، بومبا تۋرالى اقپارات وتىرىك بولىپ شىققانى حابارلانىپ، بورتتا بولعان 26 جاستاعى جۋرناليست رومان پروتاسيەۆيچ پەن سۇيىكتىسى سوفيا ساپەگا قاماۋعا الىنعان.
باتىس ەلدەرى بەلارۋسسيانى Ryanair ۇشاعىن "بارىمتالادى" دەپ ايىپتادى.
رەيس باعىتى قالاي وزگەرتىلدى؟
FR4978 رەيسى ليتۆا شەكاراسىنا جەتكەنىنە كوپ بولماي، مينسكە قاراي باتىسقا بۇرىلادى.
Ryanair مالىمدەمەسىندە ەكيپاج مۇشەلەرىنە بەلارۋس اۋەديسپەچەر قىزمەتىنەن بوردتاعى ىقتيمالدى ءقاۋىپ تۋرالى حابارلاما كەلىپ، جاقىن ماڭداعى مينسك اۋەجايىنا قونۋ تۋرالى نۇسقاۋ بەرىلگەنى ايتىلادى.
Flightradar24 سايتىندا كورسەتىلگەن ۇشۋ تراەكتورياسىنا سايكەس، ۇشاق بۇرىلعان ساتتە مينسككە قاراعاندا ۆيلنيۋسكە جاقىن بولعان.
كەي جولاۋشىلار ينسيدەنت باستالعاندا پروتاسيەۆيچتىڭ مازاسىزدانعانىن كورگەنىن ايتقان. "ول وزىنە ءولىم جازاسى ءقاۋپى ءتونىپ تۇرعانىن ايتتى" دەگەن 40 جاستاعى مونويكا سيمكيەنە AFP اگەنتتىگىنە.
باسقا جولاۋشى Reuters-كە پروتاسيەۆيچ جاعدايدى بىلگەندە نوۋتبۋگى مەن تەلەفونىن جوعارعى شكافتان شىعارىپ، جانىنداعى سۇيىكتىسىنە بەرگەنىن حابارلاعان. الايدا ليتۆا پرەزيدەنتى پروتاسيەۆيچتىڭ سەرىگىنە ۇشاققا ورالۋعا رۇحسات ەتپەگەنىن ءمالىم ەتتى.
ساپەگانىڭ اناسى ۆۆس-گە جىگىتتى مينسك تۇرمەسىنە اپارىلعانىن جانە ونىڭ WhatsApp مەسسەندجەرىندە سوڭعى رەت "ماما" دەپ جازعانىن ايتقان. ساپەگاعا قانداي ايىپ تاعىلعانى ازىرگە انىق ەمەس.
پروتاسيەۆيچ كىم؟
پروتاسيەۆيچ Nexta مەديا-كومپانياسىنىڭ، Telegram كانالىنىڭ بۇرىنعى رەداكتورى. ول 2019 جىلى بەلارۋستەن كەتىپ، 2020 جىلعى پرەزيدەنت سايلاۋى بارىسىن اقپاراتتاندىرىپ وتىرعان. Nexta بەلارۋستەگى پرەزيدەنت سايلاۋى كەزىندە وپپوسيسيانىڭ داۋىس بەرۋىندە شەشۋشى ءرول اتقاردى. وپپوزيسيا لۋكاشەنكو داۋىس ۇرلادى دەپ سانايدى. ۇكىمەت جاڭالىقتاردى تاراتپاي قويعاننىن كەيىن بۇل پىكىردەگى ادامدار كوبەي ءتۇستى. وسىدان كەيىن وعان تەرروريزم مەن تارتىپسىزدىكتى قوزدىرۋ بويىنشا ايىپ تاعىلعان.
باتىس ليدەرلەرى وپپوزيسيا باسشىسى كانديدات سۆەتلانا تيحانوۆسكايانى قولداعان. سايلاۋدان كەيىن لۋكاشەنكونىڭ جەڭىسىنە نارازى ونداعان مىڭ ادام بىرنەشە اي بويعى الاڭعا شىققان. نارازىلىق اكسياسىنا شىققانداردى جەرگىلىكتى پوليسيا ۇرىپ-سوققان، ازاپتاعان ارەكەتتەر كوپتەپ بولىپ، ونداي جاعدايلاردى Nexta ۇدايى جاريالاپ وتىرعان. بيىلدىڭ وزىندە پوليسيا تالاپىنان جاسالعان اياۋسىز ارەكەتتەردىڭ كوپتەگەن جاعدايلارى تىركەلىپ، 2700-دەن استام سوتتاۋ ىستەرى بولعان.
الەكساندى لۋكاشەنكو بەلارۋستى 1994 جىلدان بەرى باسقارىپ كەلەدى. ول پرەزيدەنت رەتىندە 6 مارتە قايتا سايلانعان. ونىڭ ساياساتتا "ەۋروپانىڭ سوڭعى ديكتاتورى" دەگەن اتى بار.
پىكىر قالدىرۋ