ماڭعىستاۋ وبلىسىنداعى ەپيدەميولوگيالىق احۋالعا بايلانىستى بيىلعى وقۋ جىلىنىڭ باسىم بولىگى قاشىقتان وقىتىلدى. دەگەنمەن دە اقپاراتتىق تەحنولوگيالاردى قولدانا وتىرىپ قاشىقتان وقىتۋ وقۋشىلار مەن ۇستازداردىڭ ءبىلىمى مەن بىلىگىن جاڭاشا دامىتۋعا، ادەتى مەن داعدىسىنا ءتيىمدى قاراۋعا مۇمكىندىك بەردى.

قاشىقتان وقىتۋعا قاراماستان بيىل وقۋشىلاردىڭ جەتىستىكتەرى دە از ەمەس.

تۇلەكتەردىڭ 227-سى "التىن بەلگىگە"، 359-ى "ۇزدىك اتتەستاتقا" ۇمىتكەر. سوڭعى ءۇش جىلمەن سالىستىرعاندا "التىن بەلگى" يەگەرلەرى شامامەن 30%-عا، ۇزدىك اتتەستاتپەن بىتىرگەندەر 40%-عا ارتتى.

جالپى ءبىلىم بەرەتىن پاندەر بويىنشا رەسپۋبليكالىق وليمپيادادا ماڭعىستاۋ وبلىسىنىڭ دارىندى وقۋشىلارى 29 مەدالعا يە بولدى.

وليمپيادا ناتيجەسى بويىنشا ماڭعىستاۋ وبلىسى كوماندالىق ءىىى ورىندى، اقتاۋ قالاسىنىڭ "ءبىلىم-يننوۆاسيا" ليسەيى ءىى ورىندى، مۇنايلى اۋدانى №3 جالپى ءبىلىم بەرەتىن مەكتەبى "ۇزدىك وليمپيادالىق اۋىل مەكتەبى" بولىپ تانىلدى.

ەلىمىزدە ءاربىر پەداگوگ ەرەكشە مارتەبەگە يە. مەملەكەت تاراپىنان ءاربىر پەداگوگتىڭ ۇزدىكسىز دامۋىنا بارلىق جاعداي جاسالىپ كەلەدى. وسىعان بايلانىستى بيىل العاش رەت "ماڭعىستاۋ وبلىسىنىڭ ءبىلىم بەرۋ سالاسىنا قوسقان ۇلەسى ءۇشىن" توسبەلگىسى تاعايىندالدى.

پەداگوگتاردىڭ شەبەرلىگى ناتيجەسىندە اقتاۋ قالاسى №14 مەكتەبىنىڭ حيميا ءپانى ءمۇعالىمى تۇلەمبەتوۆا ايسۇلۋ باعىت قىزى ەلىمىزدە العاش رەت تاعايىندالعان "قازاقستاننىڭ ەڭبەك سىڭىرگەن ۇستازى" قۇرمەتتى اتاعىن، وبلىستىڭ بەس ءمۇعالىمى رەسپۋبليكالىق "ۇزدىك پەداگوگ" اتاعىن يەلەندى.

وبلىس اكىمى سەرىكباي ترۇموۆ وقۋشىلار مەن ۇستازداردى وقۋ جىلىنىڭ اياقتالۋىمەن قۇتتىقتاپ، الداعى ءبىلىم سىناعىنان جاقسى كورسەتكىشكە قول جەتكىزۋلەرىن تىلەدى.

"قۇرمەتتى ۇستازدار، ءقادىرلى وقۋشىلار! سىزدەردى وقۋ جىلىنىڭ اياقتالۋىمەن شىن جۇرەكتەن قۇتتىقتايمىن! بيىلعى ۇلتتىق ءبىرىڭعاي تەستىلەۋدىڭ جاڭا ەرەجەسىندە تۇلەكتەرگە ەرەكشە جاعدايلار جاسالدى. بيىل بىتىرەتىن 7011 تۇلەكتىڭ بارلىعى دەرلىك ۇلتتىق ءبىرىڭعاي تەستىلەۋگە قاتىسىپ جاتىر. مەكتەپ تۇلەكتەرىنە سىناقتان سۇرىنبەي ءوتىپ، مەملەكەتتىك گرانت الىپ، قالاعان ماماندىقتارىنىڭ يەسى اتانۋلارىنا تىلەكتەسپىن! قۇرمەتتى تۇلەكتەر! تۋعان ولكەنىڭ وسىپ-وركەندەۋىنە ۇلەس قوسار ءبىلىمدى، بىلىكتى، وزات، شىن مانىندەگى ناعىز التىن تۇلەك بولۋلارىڭىزعا تىلەكشىمىن.تاۋەلسىز قازاقستاننىڭ تۋىن بيىك ۇستار ازامات بولىڭىزدار! دەلىنگەن اكىم قۇتتىقتاۋىندا.