ساياساتتانۋشى، بۇرىن الماتى قالاسى، پرەزيدەنت اكىمشىلىگىندە ىستەپ، جيھاز جاساۋ بيزنەسىنە بەت بۇرعان سانجار بوقايەۆ سوڭعى ۋاقىتتا وتاندىق اۆتوكولىك ءوندىرىسى سالاسىنداعى كوزبوياۋشىلىقتار تۋرالى ءجيى ماسەلە كوتەرىپ ءجۇر. ول ۇكىمەت سايتىنان قازاقستان 167 اۆتوكولىك مودەلىن وندىرەتىنى تۋرالى اقپارات كورىپ، يندۋستريا جانە ينفراقۇرىلىمدىق دامۋ مينيسترلىگىنەن 167 مودەلدىڭ ناقتى اتىن اتاپ، ءتۇسىن تۇستەۋدى سۇراعان. وعان مينيسترلىك جاۋاپ بەرگەن. ساياساتتانۋشى مينيسترلىك جاۋابىنا قاناعاتتانبايتىنىن ايتىپ، پرەمەر-مينيستر اسقار ءماميندى ماسەلەگە ءجىتى نازار اۋدارۋدى سۇرايدى.
– ق ر يندۋستريا مينيسترلىگى ءبىز قانداي 167 اۆتوكولىك مودەلىن وندىرەمىز دەگەن سۇراعىما جاۋاپ بەردى. مينيسترلىكتىڭ جاۋابىن قاناعاتتانارلىقسىز دەپ ەسەپتەيمىن. 40 مودەلدى اتاپ شىعۋ، ونىڭ ىشىندە 20-سىن ءبىز وندىرمەيمىز، دايىن كۇيىندە الىپ كەلەمىز، ال 80 مودەلدى كامازداردىڭ تۇرلەرى، تاعى 39 مودەل اۆتوبۋستار دەۋ، جاي عانا وتىرىكتى اقتاۋعا تىرىسۋ ەمەس، ءىستىڭ ناقتى ءمان-جايىن ماقساتتى تۇردە جاسىرۋ دەپ ەسەپتەيمىن. بۇل ۇكىمەت باسشىسى رەتىندە ءسىزدىڭ مۇقيات تەكسەرۋ جانە باعالاۋ جۇرگىزۋىڭىزدى تالاپ ەتەتىن ماسەلە، – دەگەن ول قازاقستان "حالىق ۇنىنە قۇلاق اساتىن مەملەكەت" قۇرىپ جاتقانىن قاپەرگە الىپ، مينيسترلىك دەرەكتەردى تۇزەتۋدىڭ ورنىنا، ءوزىنىڭ قىر سوڭىنا ءتۇسىپ، ارانداتۋ ارەكەتتەرىن ۇيىمداستىرىپ، اقپاراتتىق سوعىس اشقانىن ايتادى.
ول مينيسترلىك سوڭعى 10 جىل ىشىندە 130 جاڭا ماشينا قۇراستىرۋ زاۋىتى قايدا سالىنعان دەگەن ساۋالدى دا جاۋاپسىز قالدىرعانىن جەتكىزىپ، يندۋستريا مينيسترلىگى قاتەلىكتەرىن تۇزەتىپ، 15 كۇن ىشىندە جاۋاپ بەرمەسە، ەسەپ كوميتەتى مەن باس پروكۋراتۋراعا جۇگىنەتىنىن ءمالىم ەتتى.
– ءسوز سوڭىندا ايتارىم، ءوزىم بارىپ قازاقستاندىق قامتۋدى ساناپ شىعۋ ءۇشىن 130 زاۋىتتىڭ مەكەنجايى بويىنشا اقپارات بەرۋدى سوت ارقىلى تالاپ ەتەمىن. ازىرگە ۇكىمەتتىڭ بارلىعىن تەكسەرۋگە، تۇزەتۋگە جانە قوعامعا اقپاراتتى جەتكىزۋگە مۇمكىندىگى بار. اسقار ۇزاقباي ۇلى، سىزدەن "حالىق ۇنىنە قۇلاق اساتىن مەملەكەتتى" قامتاماسىز ەتۋىڭىزدى وتىنەمىن. مەن ءسىزدىڭ قىزمەتتەن كەتۋىڭىزدى سۇرامايمىن. ءسىزدى نەمەسە ءسىزدىڭ مينيسترلەرىڭىزدى اۋىستىرعاننان ەشتەڭە وزگەرمەيدى. ويتكەنى ءدال سونداي ادامدار ورىندارىڭىزعا كەلەدى. ءبىز قۇندىلىقتاردى وزگەرتۋگە ءتيىسپىز. وتىرىكپەن، كوزبوياۋشىلىقپەن جانە كاسىبيسىزدىكپەن كۇرەستى بىرگە جاريالايىق. سوندا اينالاداعى نارسەنىڭ بارلىعى وزگەرە باستاعانىن كورەسىز، – دەدى سانجان بوقايەۆ.
سانجان بوقايەۆ سوڭعى ۋاقىتتا الەۋمەتتىك جەلىدەگى پاراقشالارى مەن بەرگەن سۇحباتتارىندا ءوزى كەزىندە بەلورتاسىندا جۇرگەن مەملەكەتتىك قىزمەتتىڭ تيىمسىزدىگى، قازاقستانداعى جەمقورلىق، بيۋدجەت قارجىسىنىڭ ءجون-جوسىقسىز ىسىراپ ەتىلىپ جاتقانى تۋرالى ءجيى ايتىپ ءجۇر.
ول كەيىنگى جازبالارىندا وتاندىق ءاۆتووندىرىس سالاسىنداعى كوزبوياۋشىلىقتار تۋرالى جازا باستاعان. ۇزاماي وزدەرىن ماشينا جاسايتىن ءوندىرىس ورىندارىندا ىستەيتىن ماماندار دەپ تانىستىرعان ادامدار بوقايەۆتى "جالعان اقپارات تاراتىپ وتىرعانى" ءۇشىن ايىپتاپ، اۆتوونەركاسىپ سالاسى قالاي ءجۇرىپ جاتقانىن ءوز كوزىمەن كورۋى ءۇشىن زاۋىتتاردى ارالاۋعا شاقىرعان. بوقايەۆ سونداي زاۋىتتاردىڭ ءبىرى ورنالاسقان جامبىل وبلىسى قورداي اۋدانى اۋقاتتى اۋىلىنا بارىپ، ماشينا قۇراستىراتىن ورىن دەلىنگەن جەردە بىردە-بىر ستانوك جوعىن انىقتاعان. سول جەردەنى ادامدار ونىڭ سۇراقتارىنا جاۋاپ بەرە الماي، تەلەفونىن تارتىپ الۋعا، ءوزىن ارانداتۋعا تىرىسقان.
سانجان بوقايەۆ اۆتوكولىك ءوندىرىسىنىڭ الپاۋىتى سانالاتىن جاپونيا مەن گەرمانيانىڭ وزىندە 14 جانە 15 الەمدىك برەند شىعارىلاتىنىن، ال ۇكىمەت سايتىندا قازاقستاندا 22 الەمدىك برەندتىڭ 167 ۇلگىسى قۇراستىرىلاتىنى تۋرالى اقپارات جازىلعانىنا تاڭعالعانىن جەتكىزگەن.
