پرەزيدەنت قاسىم-جومارت توقايەۆ دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس ادحانوم گەبرەيەسۋسپەن ۆيدەو كونفەرەنسيا رەجيمىندە كەزدەسۋ وتكىزدى، دەپ حابارلادى اقوردا سايتى.
كەزدەسۋ بارىسىندا قازاقستان مەن دۇنيەجۇزىلىك دەنساۋلىق ساقتاۋ ۇيىمى اراسىنداعى، اتاپ ايتقاندا، كوروناۆيرۋس پاندەمياسىنا قارسى ءىس-قيمىل بويىنشا ىنتىماقتاستىقتى نىعايتۋدىڭ پەرسپەكتيۆالارى قاراستىرىلعان.
اقوردا سايتىنىڭ مالىمەتىنشە، اڭگىمەلەسۋ بارىسىندا COVID-19 ىندەتىنە قارسى ەكپە ەگۋ ۇدەرىسىنە باسا ءمان بەرىلگەن. پرەزيدەنت دۇنيەجۇزىلىك دەنساۋلىق ساقتاۋ ۇيىمىنىڭ باسشىسىنا قازاقستاندىق QazVac ۆاكسيناسىنىڭ كلينيكالىق سىنامالارىنىڭ الدىن الا ناتيجەلەرى تۋرالى ايتقان.
"وتاندىق ۆاكسينانىڭ تيىمدىلىك دەڭگەيى 96 پايىز. قازىرگى ۋاقىتتا سالالىق ورگاندار وتاندىق ۆاكسيناعا كەلىسىم الۋ ءۇشىن دۇنيەجۇزىلىك دەنساۋلىق ساقتاۋ ۇيىمىمەن جۇمىس جۇرگىزىپ جاتىر. تەدروس ادحانوم گەبرەيەسۋس قاسىم-جومارت توقايەۆتىڭ پاندەمياعا قارسى كۇرەستەگى ەڭبەگىنە جوعارى باعا بەردى.
سونىمەن قاتار ول QazVac ەكپەسىنىڭ ازىرلەمەسىن قولدايتىنىن جانە دۇنيەجۇزىلىك دەنساۋلىق ساقتاۋ ۇيىمى توتەنشە جاعداي كەزىندە پايدالانۋعا بولاتىن دارى-دارمەكتەردىڭ تىزىمىنە قوسۋ مۇمكىندىگىن قاراستىرۋعا دايىن ەكەنىن ايتتى" دەلىنگەن اقپاراتتىق حابارلامادا.
تاراپتار سونداي-اق العاشقى مەديسينالىق-سانيتارلىق كومەك قىزمەتىنىڭ دامۋ پەرسپەكتيۆالارىن، اتاپ ايتقاندا، 2018 جىلى قابىلدانعان استانا دەكلاراسياسىن ىلگەرىلەتۋ ماسەلەسىن قوزعاعان.
"وسى ورايدا مەملەكەت باسشىسى قازاقستاننىڭ باستاماسى بويىنشا ازىرلەنەتىن العاشقى مەديسينالىق-سانيتارلىق كومەك تۋرالى ساياسي رەزوليۋسيانى قولداۋعا شاقىردى. اتالعان قۇجات 2022 جىلى وتەتىن بۇۇ باس اسسامبلەياسىنىڭ كەزەكتى سەسسياسىندا قابىلدانۋى مۇمكىن. رەزوليۋسيا جوباسىندا استانا دەكلاراسياسىنىڭ مىندەتتەرى مەن العاشقى مەديسينالىق-سانيتارلىق كومەك مەحانيزمدەرى قامتىلعان" دەپ جازدى اقوردا سايتى.
پىكىر قالدىرۋ