بۇگىن ءماجىلىس سپيكەرى نۇرلان ءنىعماتۋليننىڭ توراعالىعىمەن وتكەن جالپى وتىرىستا دەپۋتاتتار مەملەكەت باسشىسىنىڭ تاپسىرماسىمەن ازىرلەنگەن جەر قاتىناستارىن دامىتۋ تۋرالى زاڭ جوباسىن ماقۇلدادى.

نۇرلان نىعماتۋلين جەردى پايدالانۋ مەن قورعاۋدى باقىلاۋ زاڭ دەڭگەيىندە كۇشەيەتىنىن العا تارتتى.

– بۇل قۇجات مەملەكەت باسشىسى قاسىم-جومارت كەمەل ۇلى توقايەۆتىڭ تىكەلەي تاپسىرماسىمەن ازىرلەندى. وسى زاڭ جوباسى بويىنشا، ەڭ الدىمەن، حالقىمىزدىڭ نازارىندا جۇرگەن وتە ماڭىزدى جەر ماسەلەسى بويىنشا ناقتى شەشىم قابىلداندى. ەڭ باستىسى، اۋىل شارۋاشىلىق ماقساتىنداعى جەرلەردى جالعا بەرۋ زاڭمەن بەكىتىلدى. وسى ماسەلەگە قاتىستى قوعامدا ءارتۇرلى پىكىرلەر، ءارتۇرلى ويلار ايتىلدى، – دەدى ول.

جالپى، زاڭ جوباسىندا جەردى جەكەمەنشىككە بەرۋ 5 جىلعا توقتاتىلادى.

ءماجىلىس ءتوراعاسى اتاپ وتكەندەي، قازاقستاندىقتاردىڭ اۋىل شارۋاشىلىققا باعىتتالعان جەرلەرىن مەملەكەتتەن ساتىپ الماي، جالعا بەرۋ قۇقىعىن يەلىكتەن شىعارۋ مۇمكىندىگى قاراستىرىلعان.

وسى رەتتە، پالاتا سپيكەرى جالپى زاڭ جوباسى جەكە مال جايۋ ءۇشىن قاجەتتى جايىلىم تاپشىلىعىن شەشۋگە ىقپال ەتىپ، سونداي-اق جەر ۋچاسكەلەرى بويىنشا اقپاراتتىڭ قولجەتىمدىلىگى مەن اشىقتىعى دا كۇشەيەتىنىن اتاپ ءوتتى.

ءماجىلىستىڭ باسپا ءسوز قىزمەتى