ءبىلىم جانە عىلىم ءمينيسترى اسحات ايماعامبەتوۆ شارىن شاتقالىندا وقۋشىلاردى قۇتقارۋ كەزىندە قايتىس بولعان №199 گيمنازيانىڭ ءمۇعالىمى مەرەي يبراگيموۆتىڭ وتباسىنا كوڭىل ايتتى. بۇل تۋرالى ءبىلىم جانە عىلىم مينيسترلىگى باسپا ءسوز قىزمەتىنىڭ جەتەكشىسى ءمولدىر ابدۋالييەۆا Facebook پاراقشاسىندا جازدى.
"ا. ايماعامبەتوۆ شارىن شاتقالىنداعى قايعىلى وقيعا كەزىندە قايتىس بولعان ءمۇعالىم مەرەي يبراگيموۆتىڭ وتباسىنا باردى. ول مارقۇمنىڭ تۋعان-تۋىستارىنا كوڭىل ايتىپ، 26 جاستاعى پەداگوگتىڭ اتا-اناسىنا ەرجۇرەك جانە باتىر ەر ازاماتتى تاربيەلەگەنى ءۇشىن العىس ايتتى.
مەرەي يبراگيموۆ 29 مامىر سەل تاسقىنى ورىن العان كۇنى شارىن شاتقالىنا ەكسكۋرسياعا بارعانداردىڭ قاتارىندا بولدى. جاس ءمۇعالىم وقۋشىلاردى قۇتقارىپ قالۋ ءۇشىن ءوز ءومىرىن قيدى" دەلىنگەن جەلىدەگى جازبادا.
ەسكە سالا كەتەيىك، 29 مامىر كۇنى الماتىداعى دارىندى بالالارعا ارنالعان مامانداندىرىلعان №199 گيمنازيانىڭ 5 "ءا" سىنىبىندا وقيتىن 8 وقۋشى، 5 اتا-انا، 3 مۇعالىمنەن تۇراتىن توپ شارىن شاتقالىنا ەكسكۋرسياعا شىققان بولاتىن.
سول كۇنى ءتۇس كەزىندە، شاتقالدا سەل ءجۇرىپ، كەنەتتەن 15 مينۋت بويى بۇرشاق ارالاسقان نوسەر جاۋعان. وقىس وقيعا سالدارىنان مەرەي يبراگيموۆ ەسىمدى ءمۇعالىم مەن رانيا قاسەن ەسىمدى وقۋشى قازا تاپقان.
قازا تاپقان ءمۇعالىم مەرەي يبرايموۆ 26 جاستا بولعان. گيمنازيادا 3 جىل جۇمىس ىستەگەن. گيمنازيا ديرەكتورى ساندۋعاش نىشانوۆا قىزمەتكەرى چەحيادا، يتاليادا وقىعانىن، مىنەزى اشىق، اقجارقىن، بالالاردىڭ سۇيىكتى ءمۇعالىمى بولعانىن ايتادى.
پىكىر قالدىرۋ