الەۋمەتتىك جەلىدە الماتى اكىمدىگى شەتەلدىك بلوگەرلەرگە 26 ميلليون تەڭگە جۇمساماق دەگەن اقپارات تاراۋدا. بۇل اقپاراتتى تۋريزم باسقارماسىنىڭ باسپا ءسوز قىزمەتى راستادى.

Protenge Telegram ارناسىنىڭ حابارلاۋىنشا، شەتەلدەن كەلەتىن 20 بلوگەرگە 26 ملن تەڭگە اقشا بولىنبەك. بۇل اقشاعا گرۋزيا، ارمەنيا، بەلارۋس، رەسەي، ۋكراينا، تۇركيا، كورەيا، ءباا جانە گونكونگتەن كەلەتىن بلوگەرلەردىڭ ۇشاقپەن كەلۋ-كەتۋ بيلەتى، بەس جۇلدىزدى قوناق ءۇيى، ءۇش مەزگىل تاماعى كىرەدى.

سونداي-اق ولارعا مەدەۋ، كوكتوبە جانە كوك بازاردى كورسەتەدى. ساپار سوڭىندا ۇلتتىق تاعامداردى ازىرلەۋدەن ماستەر-كلاسستار وتكىزىلىپ، ەستەلىك سىيلىقتار تابىستالادى.

الەۋمەتتىك جەلىدەگى اقپاراتقا الماتى تۋريزم باسقارماسى تۇسىنىكتەمە بەردى.

"26 ميلليون تەڭگەگە "الماتى قالاسىنىڭ تۋريستىك اقپاراتتىق ورتالىعى" ج ش س 20 ادامعا ارنالعان ەكى بلوگ-تۋر ۇيىمداستىرۋدى جوسپارلاپ وتىر. وعان گرۋزيا، ارمەنيا، بەلارۋسسيا، رەسەي، ۋكراينا، تۇركيا، كورەيا، ءباا، گونكونگتان بلوگەرلەر مەن جۋرناليستەر قاتىسادى.

بلوگ-تۋر الماتى قالاسىنىڭ تانىمىن ارتتىرۋ جانە ونىڭ تۋريستىك الەۋەتىن دامىتۋ ماقساتىندا ۇيىمداستىرىلادى.

بلوگ-تۋرعا 40-تان استام شەتەلدىك تۋريستىك بلوگەرلەر مەن ميلليوننان استام ادامدى قامتىعان مەديا-جەكە تۇلعالار كىرەدى" دەلىنگەن باسپا ءسوز قىزمەتى تاراتقان حابارلامادا.

دەپارتامەنت شەتەلدىك بلوگەرلەرمەن جۇمىس جاساۋ قازاقستان مەن الماتىعا كەلەتىن تۋريستەر اعىنىن كوبەيتەتىنىن اتاپ ءوتتى.