بالالار ادەبيەتىنىڭ جازۋشىسى، اقىن قاستەك بايانباي قايتىس بولدى. بۇل تۋرالى اقپارات جانە قوعامدىق دامۋ ءمينيسترى ايدا بالايەۆا facebook پاراقشاسىندا جاريالادى.
– "بار ادەبيەتتىڭ باستاۋى – بالالار ادەبيەتى” دەگەن قاستەك اعامىز ءوزىنىڭ بۇكىل سانالى عۇمىرىن بالالار ادەبيەتى جولىنا ارناپ، جالىندى ولەڭدەر مەن اڭگىمەلەر جازدى، مازمۇندى اۋدارمالار جاسادى، قازاق جۋرناليستيكاسىن دامىتۋعا ايانباي ەڭبەك ەتتى. اعامىزدىڭ مول ادەبي مۇراسى – توزباس رۋحاني قازىنا بولىپ، زيالى بولمىسى – قالىڭ وقىرمان قاۋىمنىڭ ماڭگىلىك ەسىندە ساقتالادى. مارقۇمنىڭ جاتقان جەرi جارىق، توپىراعى تورقا بولىپ، نۇرى پەيىشتە شالقىسىن، – دەپ جازادى مينيستر.
قاستەك بايانباي 1936 جىلى 15 قاراشادا الماتى وبلىسى الاكول اۋدانىنداعى تالدىبۇلاق اۋىلىندا تۋعان. قازاق مەملەكەتتىك ۋنيۆەرسيتەتىن بىتىرگەن. جۋرناليستيكا سالاسىنداعى ەڭبەك جولىن 1960 جىلدان باستاعان. 1971-1995 جىلدارى "جازۋشى" باسپاسىندا رەداكسيا مەڭگەرۋشىسى "جالىن" باسپاسىندا باس رەداكتور قىزمەتتەرىن اتقارعان.
بالالارعا ارنالعان "ارعىماق" دەگەن العاشقى جيناعى "جالىن" باسپاسىنان جارىق كوردى. اقىننىڭ ولەڭدەرى مەكتەپ وقۋلىعىنا ەنگەن، ەرتەگىلەرى بويىنشا مۋلفيلم تۇسىرىلگەن. شىعارمالارى ورىس، ۋكراين، وزبەك، بولگار، ءازىربايجان تىلدەرىنە اۋدارىلعان.1986 جىلى "ءتاتتى ساباق" جيناعى ءۇشىن ءىلياس جانسۇگىروۆ اتىنداعى سىيلىق بەرىلدى. 2005 جىلى "ەرەن ەڭبەگى ءۇشىن" مەدالىمەن ماراپاتتالعان.
پىكىر قالدىرۋ