NurOtan پارتياسى ءتوراعاسىنىڭ ءبىرىنشى ورىنباسارى باۋىرجان بايبەكتىڭ ازاماتتىق بەلسەندىلەر، ەرلى-زايىپتى جانبولات ماماي مەن ينگا يمانبايعا قارسى بەرگەن تالاپ-ارىزى بويىنشا كەزەكتى سوت وتىرىسى ءوتىپ جاتىر. سوتتا باۋىرجان بايبەكتىڭ مۇددەسىن قورعاپ جاتقان زاڭگەر ايجان تاشەنوۆا ەرلى-زايىپتىلاردىڭ ءسوزى مەن ءىسى ومىردە قابىسپايتىنىن ءمالىم ەتتى.

زاڭگەر ج.مامايدىڭ ءار سوزىندە ەۋروپالىق جانە حالىقارالىق ستاندارتتاردى مىسالعا كەلتىرەتىنى، ءسوز بوستاندىعى، زاڭ ۇستەمدىگى تۋرالى ءجيى ايتاتىنى جاي عانا بەتپەردە ەكەنىن ايتادى.

– ءوزىنىڭ كۇندەلىكتى ومىرىندە بۇلار وزدەرى ايتىپ جۇرگەن ستاندارتتارىن ورىنداي بەرمەيدى. ماسەلەن، سوتتا ايقايلايدى، سوتتىڭ جابىق ءوتىپ جاتقانىن ايتىپ شۋ شىعارادى، سوتتاعى نەگىزگى تاقىرىپتى بۇرىپ، باسقا ماسەلە قوزعايدى، دالەل بەرەتىن مەرزىمدى كەشىكتىرەدى. ياعني، زاڭ ۇستەمدىگى بۇلار ءۇشىن بوس ءسوز. مەن ءوزىم ەۋروپادا سوتتا تاجىريبەدەن ءوتتىم. ول جاقتا بىرەۋدىڭ سىرتىنان نەگىزسىز جالا جابۋعا ەشكىمگە رۇقسات ەتىلمەيدى. ويتكەنى، ءاربىر ادام، ونىڭ ىشىندە ءوزىن جۋرناليست نەمەسە ساياساتكەر سانايتىن ءار تۇلعا بىلەدى – بىرەۋگە قاتىستى ايتقان ءار سوزىڭە دالەلىڭ بولۋى شارت. ولاي بولماعان جاعدايدا سەنىڭ ايتقانىڭ بوس جالا جانە سول ءۇشىن سوتتا جاۋاپ بەرەسىڭ.

ەگەر شەتەلدىك تاجىريبەمەن قارايتىن بولساق، ماماي مەن يمانبايدىڭ سوت پروسەسىن ساياسي كەلەكەگە اينالدىرۋى، ميتينگتەر ارقىلى قىسىم كورسەتۋى – جاۋاپكەرشىلىك دەپ ايتۋعا بولادى. ول ءۇشىن ءىرى كولەمدە ايىپپۇل تولەۋى نەمەسە باس بوستاندىعىنان ايرىلۋى مۇمكىن. ەگەر جاۋاپ بەرۋشى تاراپ حالىقارالىق ستاندارتتار تۋرالى ايتار بولسا، ول ەندەشە زاڭدى دا قۇرمەتتەۋى كەرەك جانە ونىڭ تالاپتارىنا باعىنۋى كەرەك، – دەدى ايجان تاشەنوۆا.

ول سونداي-اق  سوت ءتوراعاسىنا ب ا ق وكىلدەرىنە كەدەرگى كەلتىرمەي، بارىنە قاتىسۋعا مۇمكىندىك بەرگەنى ءۇشىن العىسىن ايتتى.