بۇگىن ماجىلىستە پالاتا ءتوراعاسى نۇرلان نىعماتۋلين ارمەنيا رەسپۋبليكاسىنىڭ پرەزيدەنتى ارمەن ساركيسيانمەن كەزدەستى.

نۇرلان نىعماتۋلين ارمەنيا پرەزيدەنتىنىڭ ەلىمىزگە ەكى مەملەكەت تاۋەلسىزدىگىنىڭ 30 جىلدىعىنا ارنالعان مەملەكەتتىك ساپارىنىڭ ماڭىزدىلىعى تۋرالى ايتتى.

سونىمەن قاتار، ءماجىلىس ءتوراعاسى ارمەنيا پرەزيدەنتى قازاقستاننىڭ تۇڭعىش پرەزيدەنتى، ەلباسى نۇرسۇلتان نازاربايەۆپەن، سونداي-اق مەملەكەت باسشىسى قاسىم-جومارت توقايەۆپەن كەلىسسوزدەر بارىسىندا قول جەتكىزىلگەن ۋاعدالاستىقتاردى ءىس جۇزىندە جۇزەگە اسىرۋ ءۇشىن ساياسي ديالوگتى جانە قازاقستان-ارمەنيا اراسىنداعى جان-جاقتى ءوزارا ءىس-قيمىلدى نىعايتۋعا ىقپال ەتەتىنىنە سەنىم ءبىلدىردى.

ءماجىلىس ءتوراعاسىنىڭ ايتۋىنشا، قازاقستاندىق پارلامەنتشىلەر بۇل ءۇشىن قاجەتتى زاڭنامالىق كومەك كورسەتەدى.

ءوز كەزەگىندە، ارمەنيا پرەزيدەنتى ەلىمىزدىڭ جاھاندىق ۇدەرىستەردەگى ءرولىن اتاپ ءوتىپ، قازاقستاننىڭ باستى جەتىستىكتەرىنىڭ ءبىرى – ۇلتارالىق جانە كونفەسسياارالىق كەلىسىمدى اتادى.

ارمەن ساركيسيان اتاپ وتكەندەي، قازاقستان – ەۋرازيالىق يدەيانىڭ نەگىزىن قالاۋشى جانە ورتالىق ازياداعى عانا ەمەس، ەۋرازيالىق كەڭىستىكتەگى ساياسي ورتالىققا اينالعان مەملەكەت.

• قازاقستان – تۇڭعىش پرەزيدەنت نۇرسۇلتان نازاربايەۆ نەگىزىن قالاعان، ال بۇگىندە مەملەكەت باسشىسى قاسىم-جومارت توقايەۆ ءداستۇرلى تۇردە جالعاستىرىپ كەلە جاتقان ورتالىق ازيادا عانا ەمەس، جالپى وڭىردە بولىپ جاتقان بارلىق ۇدەرىستەردىڭ بەلسەندى قاتىسۋشىسى بولىپ تابىلاتىن ەل، - دەدى ارمەن ساركيسيان.

قازاقستان-ارميان ىنتىماقتاستىعى تۋرالى ايتا كەلە، ارمەنيا پرەزيدەنتى قازاقستاندى ۇقشۇ، ەاەو جانە باسقا دا حالىقارالىق ۇيىمدارداعى جاقىن سەرىكتەس ەل دەپ اتادى. بۇل رەتتە، ارمەن ساركيسيان ودان ءارى ءوزارا ءىس-قيمىل ءۇشىن، ونىڭ ىشىندە پارلامەنتارالىق بايلانىستىڭ ماڭىزدىلىعىن دا اتاپ ءوتتى.

نۇرلان نىعماتۋلين ساياسي جۇيەنى رەفورمالاۋ، ازاماتتىق قوعامدى دامىتۋ جانە مەملەكەت باسشىسىنىڭ باستاماسى بويىنشا وتاندىق زاڭناماعا ەنگىزىلگەن وزگەرىستەر تۋرالى ايتتى.  ونىڭ ىشىندە، ساياسي پارتيالاردىڭ پارلامەنتكە ءوتۋ شەگىن تومەندەتۋ، سايلاۋ بيۋللەتەندەرىنە "بارلىعىنا قارسى" باعانىن ەنگىزۋ بەكىتىلگەن "قازاقستان رەسپۋبليكاسىنداعى سايلاۋ تۋرالى" زاڭعا ەنگىزىلگەن وزگەرىستەر.

سونىمەن قاتار، ءماجىلىس ءتوراعاسى قازاقستان ارمەنيامەن جان-جاقتى قارىم-قاتىناستاردى دامىتۋعا زور ءمان بەرەتىنىن جانە وڭتۇستىك كاۆكاز وڭىرىندەگى سەنىمدى سەرىكتەس مەملەكەت ەكەنىن اتاپ ءوتىپ، ارمياندىق ارىپتەستەرىمەن تمد پارلامەنتارالىق اسسامبلەياسى مەن ەقىۇ جانە ۇقشۇ پارلامەنتتىك اسسامبلەيالارى جانە باسقا دا بىرلەستىكتەر الاڭىندا تىعىز ءوزارا ءىس-قيمىل ورنىققانىنا نازار اۋداردى.

نۇرلان نىعماتۋلين زاڭ شىعارۋ جۇمىسىندا تاجىريبە الماسۋ جانە قازاقستان مەن ارمەنيا اراسىنداعى سەرىكتەستىكتى نىعايتۋ ماقساتىندا ارميان پارلامەنتشىلەرىمەن پالاتا كوميتەتتەرى مەن ىنتىماقتاستىق توپتارى دەڭگەيىندە بايلانىستاردى جانداندىرۋعا نيەتتى ەكەنىن ايتتى.