الماتىدا ماس جۇرگىزۋشى ايالدامادا تۇرعان ءۇش جاياۋ جۇرگىنشىنى قاعىپ كەتتى. بۇل تۋرالى الماتى قالالىق پوليسيا دەپارتامەنتى حابارلادى.

وقيعا 5 ماۋسىم كۇنى ساعات 20:20 شاماسىندا بولعان.

– الكوگول جانە ەسىرتكى قولدانعان 1997 جىلعى جۇرگىزۋشى "ۆاز 21099" كولىگىمەن رايىمبەك داڭعىلىمەن باتىس باعىتتا كەلە جاتقان. ول ايالداما كەشەنىنىڭ جانىندا تۇرعان جاياۋ جۇرگىنشىلەر توبىن قاعىپ كەتتى. ولاردىڭ ۇشەۋى ءتۇرلى دەنە جاراقاتىن الىپ، قالانىڭ مەديسينا مەكەمەلەرىنە جەتكىزىلدى، – دەپ حابارلادى الماتى قالالىق پوليسيا دەپارتامەنتى باسشىسىنىڭ ورىنباسارى، پوليسيا پودپولكوۆنيگى رۋستام ءابدىراحمانوۆ.

اتالعان دەرەك بويىنشا قىلمىستىق كودەكستىڭ 345-1-بابى 2-بولىگى ("الكوگولدىك، ەسىرتكىلىك جانە (نەمەسە) ۋىتقۇمارلىق ماساڭ كۇيدە كولىك قۇرالدارىن باسقاراتىن ادامداردىڭ جول ءجۇرىسى نەمەسە كولىك قۇرالدارىن پايدالانۋ قاعيدالارىن بۇزۋى") بويىنشا سوتقا دەيىنگى تەرگەۋدى باستادى.

كۇدىكتى ۋاقىتشا ۇستاۋ اباقتىسىنا قامالدى.