ءبىلىم جانە عىلىم ءمينيسترى اسحات ايماعامبەتوۆ facebook پاراقشاسىندا بالالار قۇقىعىن قورعاۋ جونىندەگى بالالار وكىلدەرىمەن كەزدەسكەنى تۋرالى جازدى.
– جاقىندا بالالاردىڭ قۇقىقتارىن قورعاۋ جونىندەگى بالالار وكىلدەرىمەن كەزدەستىم. نۇر-سۇلتان قالاسىنداعى مەكتەپ وقۋشىلارىمەن ءداستۇرلى فورماتتا، ال جيىنعا باسقا وڭىرلەردەن قاتىسقان وقۋشىلارمەن ونلاين فورماتتا اڭگىمەلەستىك. جاسىنا قاراماستان، جەتكىنشەكتەر قويعان سۇراقتاردىڭ ءمان-مازمۇنى مەنى تاڭقالدىرعانىن اتاپ وتكىم كەلەدى. ءبىرى عالىمداردىڭ ەڭبەگى قانشالىقتى باعالانادى، عىلىمنىڭ قاي باعىتتارىن تاڭداعان دۇرىس دەپ سۇراسا، ەندى ءبىرى زاماناۋي تەحنولوگيالار بالالاردىڭ كۇندەلىكتى ومىرىندە تامىرىن تەرەڭ جايىپ بارا جاتقانىنا الاڭداۋلى. سونداي-اق وقۋشىلاردىڭ وقۋعا دەگەن قىزىعۋشىلىعىن ارتتىرۋ بويىنشا يدەيالار دا تالقىلاندى، – دەپ جازدى ايماعامبەتوۆ.
مينيستر وقۋشىلارمەن كەزدەسۋ بارىسىندا وسىدان ءبىر جىل بۇرىن مەكتەپتەردە بالالار وكىلدىكتەرىن قۇرۋ جونىندەگى شەشىم دۇرىس بولعانىنا كوز جەتكىزگەنىن جازعان. ول كىتاپحانالار جاڭا فورماتتا جۇمىس ىستەپ، بالالاردىڭ سۇيىكتى ورنىنا اينالۋى تۋرالى ايتقان.
– كوۆوركينگ ورتالىقتارىندا جاس جەتكىنشەكتەر باس قوسىپ، بىرگە كىتاپ وقىپ، وقىعاندارىن ءوزارا تالقىلاپ، پىكىرتالاسقا تۇسە الادى. سونىمەن بىرگە كوركەم ادەبيەتتى مەملەكەتتىك تىلدە وقۋ ماسەلەسىنە نازارلارىن اۋداردىم.
تالقىلانعان تاعى ءبىر ۇسىنىس – بالالار مەن مۇعالىمدەرگە مەكتەپتەگى قارجىلىق پروسەستەرگە قاتىسۋعا مۇمكىندىك بەرۋ. ياعني ولار مەكتەپ بيۋدجەتىنىڭ بەلگىلى ءبىر بولىگىن، ءتىپتى اسا كوپ بولىگى بولماسا دا، مەكتەپتى جاقسارتۋ ءۇشىن قاجەت جانە ماڭىزدى دەپ سانايتىن باعىتتارعا جۇمساۋ بويىنشا شەشىم قابىلداۋ راسىمىنە قاتىستىرۋ.
مۇنداي بىرلەسكەن شەشىمدەر پەداگوگتەر مەن وقۋشىلار اراسىنداعى بايلانىستى نىعايتىپ، بالالاردىڭ وقۋعا دەگەن قىزىعۋشىلىعىن ارتتىرادى دەپ ايتىلدى. وسى سياقتى بىرنەشە ماڭىزدى باستامالاردى تالقىلادىق. سىنىپتاستارىنىڭ مۇددەلەرىن قورعاپ جۇرگەن مەكتەپ وقۋشىلارى بۇگىنگى كەزدەسۋدەن كەيىن دە بەلسەندى ءارى جاڭاشىل بولىپ قالا بەرەدى دەپ سەنەمىن، – دەلىنگەن مينيستر جازباسىندا.
پىكىر قالدىرۋ