كەشە رەسەي پرەزيدەنتى پۋتين "نوردستريم-2" قۇرىلىسى اياقتالدى دەپ مالىمدەدى. وسىعان ۋكرايناداعى كەي رەسەيشىل ازاماتتار ورە تۇرەگەلدى – انە، قۇرىلىس اياقتالدى، ەندى ۋكراينا گازسىز قالاتىن بولدى، ويباي ەندى قايتتىك؟ قۇرىدىق. ت.س.س.

ءبىزدىڭ قازاقستاندا ماسكەۋگە بۇيرەگى بۇراتىندار جەتەرلىك: – انە، ايتتىم عوي، پۋتين سالامىن دەدى – سالدى، قانشا سانكسيا سالسا دا رف-نىڭ دىمى كەتپەيدى، رۋبل كۇشەيىپ كەلەدى، بايدەندىكى بالانىڭ ويىنى بولىپ كەتتى، گەرمانياعا سانكسيا سالمادى، ت.س.س.

ەندى شىندىق قانداي؟ قۇرىلىس ءالى اياقتالعان جوق. ءالى 100 شاقىرىم قۇبىر تارتىلۋى كەرەك. جارايدى، تارتىلسىن-اق دەلىك، سەبەبى سانكسيا سالىنعان رەسەيلىك كومپانيالار ازىرگە سانكسيانىڭ سالدارى جەتىپ ۇلگەرگەنشە قۇرىلىستى اياقتاۋى دا مۇمكىن، ونى جوققا شىعارۋعا بولمايدى. ءبىراق ەندى وسى قۇرىلىستى ەكسپلۋاتاسياعا تاپسىرۋى كەرەك قوي. جارايدى، كوميسسيا مۇشەلەرىن اقشامەن ساتىپ السا دا قۇرىلىستى تاپسىردى ەكەن دەلىك، سەبەبى كوميسسيا مۇشەلەرىنىڭ كوبى رەسەيلىكتەر بولۋى مۇمكىن. ءبىراق ەندى قۇرىلىستى سەرتيفيكاتتاۋ كەرەك قوي؟ ال ول ەۋروپالىقتار. ايتقانداي، پۋتينگە جاۋاپ رەتىندە ەۋروكوميسسيا دا بۇگىن قۇرىلىستىڭ ءالى اياقتالماعانىن جاريالادى.

ال بايدەنگە كەلسەك، ول نەگە گەرمانيا ينۆەستورلارىنا سانكسيا سالمايدى؟ ونىڭ سەبەبى – ول گەرمانيامەن جانجالداسقىسى كەلمەيدى. ترامپ پەن پۋتين ەۋروپا ەلدەرىن بولشەكتەپ ەۋرووداقتى دا، ناتو-نى دا تاراتۋعا تىرىستى، ول ءۇشىن ءارتۇرلى جانجالدار ۇيىمداستىرىپ وتىردى. بايدەن كەلىسىمەن وسى اراداعى جىكتى، سالقىندىقتى جويۋعا تىرىستى جانە ول قولىنان كەلدى دە. باتىس قايتادان ءبىرتۇتاس بولىپ بىرىگە باستادى، سونىڭ ارقاسىندا ولار سينحروندى تۇردە بىرلەسىپ بىرەسە رف-عا، بىرەسە بەلارۋسكە، بىرەسە قىتايعا سانكسيا سالا باستادى. ءبارىبىر الداعى كۇزدە جۇمىستان كەتكەلى وتىرعان مەركەلمەن شەكىسىپ جاتقىسى كەلمەيدى بايدەننىڭ. ال كۇزدە جاڭا كانسلەرمەن ساياساتتىڭ باسقاشا بولۋى دا مۇمكىن.

قۋانىش ەدىلحانتەگى

حالىقارالىق شولۋشى