سولتۇستىك كورەيا كەز كەلگەن شەتەلدىك ىقپالى بار نارسەلەرمەن، شەتەلدىك فيلمدەرمەن، شەتەلدىك كيىمدەرمەن ۇستالعانداردى نەمەسە ءتىپتى شەتەلدىك جارگونداردى قولدانعان ادامداردى قاتاڭ تۇردە جازالاۋعا باعىتتالعان جاڭا زاڭ شىعاردى. بۇل تۋرالى BBC حابارلادى.

يۋن مي-سو ەسىمدى كارىس ازاماتى وڭتۇستىك كورەيالىق درامامەن ۇستالعانى ءۇشىن ءولىم جازاسىنا كەسىلگەن ادامدى العاش كورگەندە 11 جاستا بولعانىن ايتادى.

– ونى (جازانى) بۇكىل اۋدان بويىنشا كورۋگە بۇيرىق بەرىلدى. ەگەر ءسىز بۇيرىقتى ورىنداماساڭىز، بۇل ساتقىندىققا جاتقىزىلاتىن ەدى، – دەيدى ول.

سولتۇستىك كورەيادا شەتەلدىك فيلمدەردى "كونتراباندالىق جولمەن" اكەلگەندەرگە ءولىم جازاسى كەسىلەدى.

– كوزى بايلانعان ادام تۋرالى ەسىمدە: ونىڭ كوز جاسى اعىپ جاتقانى ءالى كۇنگە دەيىن كوز الدىمدا. بۇل مەنىڭ جۇرەگىمە قاتتى اۋىر ءتيدى. كوزىن بايلاعان زات ونىڭ كوز جاسىنا شىلانعان. ولار ونى قازىققا بايلادى، سودان كەيىن اتىپ تاستادى، – دەيدى ول.

سولتۇستىك كورەيادا ءقازىر ينتەرنەت جوق، الەۋمەتتىك مەديا جوق، تەك مەملەكەت باسقاراتىن بىرنەشە تەلەارنالار بار. ول تەلەارنالار ەل باسشىلارى نە ايتقىسى كەلسە، سونى جەتكىزۋگە ارنالعان.

وڭتۇستىك كورەيانىڭ، اقش-تىڭ نەمەسە جاپونيانىڭ كوپتەگەن بۇقارالىق اقپارات قۇرالدارىن قاراپ، ۇستالعان كەز كەلگەن ادام ءولىم جازاسىنا كەسىلەدى.

جاقىندا كيم چەن ىن مەملەكەتتىك باق-تا ەلدەگى جاستار اراسىنداعى "جاعىمسىز، ينديۆيدۋالدى، انتيسوسياليستىك مىنەز-قۇلىققا" قارسى كۇرەسۋگە شاقىرعان حات جازدى. ول شەتەلدىك سويلەۋ تىلدەرىن، شاش ۇلگىلەرى مەن كيىمدەرىن "ءقاۋىپتى جانە ۋلى" دەپ سيپاتتاپ، ولاردى توقتاتقىسى كەلەدى.