قازاقستاننىڭ ۇلتتىق بانكى "7-20-25" جانە "باسپانا حيت" يپوتەكالىق تۇرعىن ءۇي باعدارلامالارىنىڭ جابىلاتىنىنا بايلانىستى مالىمدەمە جاسادى.

"7-20-25" باعدارلاماسى بويىنشا 20% باستاپقى جارنا سالا وتىرىپ، جىلىنا 7% جەڭىلدەتىلگەن مولشەرلەمەمەن 25 جىلعا ءبىرىنشى نارىقتان باسپانا الا الۋعا بولادى. جوبانى جۇزەگە اسىرۋعا 1 ترلن تەڭگە بولىنگەن. جوبا ىسكە قوسىلعان العاشقى جىلى 3 289 نەسيە بەرىلگەن (39،4 ملرد تەڭگە)، ال 2019 جىلى – 8 723 نەسيە (99،1 ملرد تەڭگە)، 2020 جىلى – 10 207 نەسيە (120،8  ملرد تەڭگە) راسىمدەلگەن. ال، وسى جىلدىڭ بەس ايى ارالىعىندا (قاڭتار-مامىر) قازاقستاندىقتار 73،9 ملرد تەڭگەگە 5 656 نەسيە العان. جالپى العاندا، وسى ۋاقىتقا دەيىن باعدارلاما بويىنشا 333،3 ملرد تەڭگە يگەرىلدى.

"حالىقتىڭ جوعارى سۇرانىسى مەن يپوتەكالىق نەسيەنىڭ قارقىنىنا قاراپ، ءبىز «7-20-25» باعدارلاماسى 2022 جىلدىڭ سوڭىنا دەيىن، ياعني بولىنگەن ليميت تاۋسىلعان سوڭ اياقتالادى دەپ بولجاپ وتىرمىز" دەپ حابارلادى ۇلتتىق بانك.

2018 جىلى 10،75% مولشەرلەمە بويىنشا "باسپانا حيت" نارىقتىق يپوتەكالىق باعدارلاماسى ىسكە قوسىلعان بولاتىن. بۇل باعىت بويىنشا باسپاناسى بار بولسا دا، ازاماتتار  العاشقى نارىقتان دا، قايتالاما نارىقتان دا ءۇي الا الادى. قارىز مەرزىمى 15 جىلعا دەيىن، ماكسيمالدىق سوماسى 35 ملن تەڭگەنى قۇرايدى.

"باسپانا حيت" باعدارلاماسىن جۇزەگە اسىرۋ ءۇشىن 600 ملرد تەڭگە بولىنگەن، سونىڭ ىشىندە 520،8 ملرد تەڭگەنى قۇرايتىن 56 752 قارىز بەرىلگەن. الايدا، باعدارلاما "اينالمالى" تەتىك ارقىلى، ياعني، قارجىلاندىرۋدىڭ ورتاق سوماسى الدىندا جابىلعان قارىز ەسەبىنەن كوبەيەتىنىن ەسكەرە كەلە، ءبىز نەسيەلەندىرۋدىڭ جالپى كولەمى 675 ملرد تەڭگە بولادى دەپ بولجاپ وتىرمىز. قارجىنىڭ بەلسەندى تۇردە يگەرىلىپ جاتقان ەسكەرە وتىرا، "باسپانا حيت" يپوتەكالىق جوباسى 2021 جىلى اياقتالادى دەگەن بولجام بار" دەپ مالىمدەگەن ۇلتتىق بانك اتالعان باعدارلامالاردىڭ جابىلاتىنى يپوتەكالىق نەسيەلەندىرۋدىڭ قولجەتىمدىلىگىنە اسەر ەتپەيدى دەپ توپشىلايدى.