ىشكى ىستەر ءمينيسترى ەرلان تۇرعىمبايەۆ الماتىلىق 19 جاستاعى اياجان ەدىلوۆانىڭ ولىمىنە قاتىستى پىكىر ءبىلدىردى. 

– بۇل جەردە تەرگەۋدىڭ ەگجەي-تەگجەيىن ايتا المايمىن. بىرىنشىدەن، ءىس الماتى قالاسىنىڭ ارنايى پروكۋرورلارى وندىرىسىندە جاتىر. ءبىز كۇدىكتىنىڭ ۇستالعانىن جانە وسى قىلمىستى جاساعانى اشكەرەلەنگەنىن جاريالادىق. سونىمەن قاتار، تەرگەۋدە ايىپتالۋشىنىڭ پسيحيكالىق جاي-كۇيىنە كۇمان تۋىنداعان كەزدە، سوت-پسيحياتريالىق ساراپتاماسى ءاردايىم جۇرگىزىلەتىنى تۋرالى العاشقى اقپاراتتى بەردىك. ونىڭ ناتيجەسىن الماتى قالاسىنىڭ پروكۋراتۋرا ورگاندارىنان بىلە الاسىز، – دەدى مينيستر حالىققا ەسەپ بەرۋ كەزدەسۋىندە.

19 ناۋرىزدا الماتىدا 19 جاستاعى اياجان ەدىلوۆا جوعالىپ كەتكەنى حابارلانىپ، 22 ناۋرىزدا كىسى قولىنان قازا تاپقانى بەلگىلى بولعان. پوليسيا "ادام ءولتىرۋ" بابى بويىنشا تەرگەۋ باستاپ، تۇركىستان وبلىسىنىڭ 1993 جىلعى تۇرعىنىن قاماۋعا العان.