12 ماۋسىمدا ماقپالساي شاتقالىنان تۇركىستان وبلىسى تاۋلارىندا جوعالىپ كەتكەن ءبىر ادامنىڭ دەنەسى تابىلدى. بۇل تۋرالى توتەنشە جاعدايلار مينيسترلىگىنىڭ باسپا ءسوز قىزمەتى حابارلادى.
شاتقال تەڭىز دەڭگەيىنەن 1000 مەتر بيىكتىكتە ورنالاسقان. تاۋلى رەلەفتىڭ، جارتاستى بەتكەيلەردىڭ كوپتىگىنەن دەنەنى تىكۇشاقپەن تاسىمالداۋ مۇمكىن بولماعان. رەسپۋبليكالىق جەدەل-قۇتقارۋ جاساعىنىڭ قۇتقارۋشىلارى وگەم وزەنى ارقىلى وتەتىن وتكەلدى (اعىس جىلدامدىعى سەكۋندىنا 20 مەتر) جاياۋ ءجۇرىپ، مايىتكە قاراي جىلجىعان.
"رەسپۋبليكالىق جەدەل-قۇتقارۋ جاساعىنىڭ قۇتقارۋشىلارى ءمايىتتى اۋە كەمەسىنە دەيىن جاياۋ كوتەرىپ اپارىپ، جۇكشىعىردىڭ كومەگىمەن اۋە كەمەسىنە كوتەردى. تابىلعان مۇردە ساراپتاما جۇرگىزۋ ءۇشىن پوليسيا قىزمەتكەرلەرىنە تاپسىردى. ىزدەۋ جۇمىستارىنا تۇركىستان وبلىسى توتەنشە جاعدايلار جانە پوليسيا دەپارتامەنتتەرىنىڭ، ۇلتتىق قاۋىپسىزدىك كوميتەتى شەكارا قىزمەتىنىڭ، ورمان شارۋاشىلىعىنىڭ، وزبەكستان رەسپۋبليكاسى توتەنشە جاعدايلار مينيسترلىگىنىڭ 127 قىزمەتكەرى، 15 بىرلىك تەحنيكا، 3 كۆادروكوپتەر، 3 كينولوگيالىق ەسەپ، 1 تىكۇشاق جانە جوعالعان تۋريستەردىڭ تۋىستارى جۇمىلدىرىلدى. ىزدەۋ جۇمىستارى سەگىز باعىت بويىنشا جۇرگىزىلۋدە" دەلىنگەن حابارلامادا.
21 مامىردا تۇركىستان سايرام-وگەم مەملەكەتتىك ۇلتتىق تابيعي پاركىنىڭ اۋماعىندا 7 ادام جوعالعان. 28 مامىردا ولاردىڭ ۇشەۋى ءدىن-امان تابىلدى، 29 مامىردا ەكى ءتۋريستىڭ ءمايىتى تابىلعان. تاعى ءبىر تۋريست قۋانىش توقتاسىننىڭ دەنەسى 12 ماۋسىمدا تابىلدى. ءبىر ادام ىزدەستىرىلىپ جاتىر.
پىكىر قالدىرۋ