جوعارى وقۋ ورنىن تاڭداعان كەزدە ءبىرقاتار ماسەلەلەرگە ءمان بەرۋ كەرەك. ءقازىر مەكتەپ تۇلەكتەرى ماماندىق تاڭداپ، ۋنيۆەرسيتەتكە تۇسۋگە دايىندالىپ جاتىر. MEDIA CLUB QAZAQSTAN پلاتفورماسىندا ءبىلىم سالاسىنىڭ ساراپشىلارى جوو تاڭداۋ بويىنشا پايدالى كەڭەستەرىن ءبولىستى. سونداي-اق ۇبت تۋرالى ءسوز قوزعادى.    

ەفير بارىسىندا كازگيۋۋ ۋنيۆەرسيتەتىنىڭ باسقارما ءتوراعاسى تالعات نارىكبايەۆ وقۋشىلارعا ارنالعان ۇبت-نى الىپ تاستاۋدى ۇسىندى. سپيكەردىڭ ايتۋىنشا، ق ر ءبىلىم جانە عىلىم مينيسترلىگى مەملەكەتتىك ءبىلىم گرانتتارىن ءبولۋ پروسەسىندە جوو-لارعا تولىقتاي سەنىم ارتۋى ءتيىس. سونداي-اق ول مەكتەپ بالانى ۇبت-عا ەمەس، ۋنيۆەرسيتەتكە تۇسۋگە دايىنداۋى كەرەك ەكەنىن ايتتى.

– مەكتەپتەردە بالالاردى تاپسىرمالاردىڭ جاۋابىن جاتتاۋعا ەمەس، شەشىمىن تابۋعا ۇيرەتۋ كەرەك. سونىڭ ارقاسىندا ولار مەكتەپ كەزىنەن  ويلانۋدى ۇيرەنەدى. ۇبت-نى الىپ تاستاپ، جوو-لار ستۋدەنتتەردى بۇرىنعىداي ەمتيحانمەن قابىلداۋ كەرەك. ەمتيحاندار تەست تۇرىندە ەمەس، ەۋروپا، امەريكاداعىداي بەلگىلى ءبىر تاپسىرمالار ارقىلى، بالانىڭ قابىلەتىن، بەلسەندىلىگىن انىقتاۋ بويىنشا وتكىزىلۋى كەرەك، – دەدى ول.

ق ر بعم ۇلتتىق تەستىلەۋ ورتالىعىنىڭ ەكس-ديرەكتورى ديدار سماعۇلوۆ تالعات نارىكبايەۆتىڭ پىكىرىمەن كەلىسەتىنىن ايتىپ، ۇبت-نىڭ جاڭا فورماتى تۋرالى سويلەدى.

– نەگىزىندە مەن ۇبت بالانىڭ ءبىلىمىن تەكسەرۋدىڭ ەڭ ءتيىمدى، ەڭ وبەكتيۆتى قۇرالى ەمەس دەگەن پىكىرمەن كەلىسەمىن. ءبىراق ءقازىر ءبىز كومپيۋتەرلىك تەستىلەۋگە كوشتىك. جاڭا فورماتتى مەملەكەتتىڭ شىعىنىن ازايتىپ، پروسەستى سيفرلاندىرۋ ءۇشىن عانا ەنگىزگەن جوقپىز. ول وقۋشىنىڭ ءبىلىمىن باعالاۋ اياسىن كەڭەيتۋگە باعىتتالعان، – دەپ اتاپ ءوتتى ديدار سماعۇلوۆ.