دەنساۋلىق ساقتاۋ مينيسترلىگى ءبىر تاۋلىكتە 967 ادامنان كوروناۆيرۋس، 11 ادامنان پنيەۆمونيا انىقتالعانىن، 11 ادام كوروناۆيرۋستان، 8 ادام پنيەۆمونيادان كوز جۇمعانىن حابارلادى.

ەلدە كوروناۆيرۋس جۇقتىرعانداردىڭ جالپى رەسمي سانى 402 239-گە جەتكەن. ونىڭ ىشىندە 4171 ادام قايتىس بولعان. 2020 جىلعى 1 تامىزدان بەرى جۇرگىزىلىپ كەلە جاتقان ستاتيستيكاعا ساي، 56 231 ادام ىندەتكە شالدىعىپ، 3415 ادام قايتىس بولعان.

14 ماۋسىمداعى مالىمەت بويىنشا، 21 537 ادام كوروناۆيرۋس ينفەكسياسىنان ەمدەلىپ جاتىر. ولاردىڭ ىشىندە 7 075 پاسيەنت ستاسيوناردا، 14 462 ناۋقاس امبۋلاتوريالىق دەڭگەيدە ەم قابىلداۋدا.

ىندەتكە شالدىققاندار اراسىندا 512 ادامنىڭ جاعدايى اۋىر، 113 پاسيەنتتىڭ جاعدايى وتە اۋىر، 70 ناۋقاس ءوجج اپپاراتىندا جاتىر.

دسم مامىردا پنيەۆمونيادان قايتىس بولعانداردىڭ سانىن كۇرت كوبەيتىپ، وعان 3 مىڭعا جۋىق ادام قوسقان. مينيسترلىك بۇل سانداردىڭ ولگەندەر ستاتيستيكاسىنا دەر كەزىندە  قوسىلماۋىن دەرەكتەردىڭ قاعازدا بولىپ كەلۋىمەن، ەلەكتروندىق بازاعا كەش كىرگىزىلۋىمەن تۇسىندىرگەن.

قازاقستاندا كوروناۆيرۋس ستاتيستيكاسىنا بايلانىستى بىرنەشە رەت داۋ تۋعان. باستاپقىدا پنيەۆمونيا ستاتيستيكاسى مۇلدە جۇرگىزىلمەدى. دۇنيەجۇزىلىك دەنساۋلىق ساقتاۋ ۇيىمىنىڭ ماماندارى مەن الەمنىڭ بىرنەشە ەلىنىڭ جانە قازاقستاننىڭ باسپا ءسوز قۇرالدارى ماسەلەگە نازار اۋدارعان سوڭ 2020 جىلعى 1 تامىزدان باستاپ مينيسترلىك پنيەۆمونيا ستاتيستيكاسىن جۇرگىزە باستادى.

قوعامدا بيلىك كوروناۆيرۋستان قايتىس بولعاندار ستاتيستيكاسىن ادەيى تومەندەتىپ كورسەتىپ وتىر دەگەن پىكىر بار. ستاتيستيكا كوميتەتى جاريالاعان دەرەككە ساي، 2020 جىلعى مامىر-شىلدە ارالىعىندا الدىڭعى جىلدارعا قاراعاندا ءولىم جاعدايى 30 مىڭعا ارتىق تىركەلگەن.

دسم كوروناۆيرۋس جۇقتىرىپ قايتىس بولعان كەي ازاماتتاردىڭ ستاتيستيكاعا ەنبەۋىن ولاردىڭ جاناما سىرقاتتاردان كوز جۇمعانىمەن تۇسىندىرەدى.