جانبولات ماماي قايتسە دە باۋىرجان بايبەكتى قارالاۋ ءۇشىن الماتىدا جۇرگىزىلگەن بارلىق رەفورمالاردى تۇبەگەيلى جوققا شىعارىپ، ءبارىن توڭكەرۋگە دايىن. ونىڭ وسىنداي ماقساتپەن جاساعان جالعان مالىمدەمەلەردىڭ ءبىرى – تەمىر قورشاۋلار مەن بيلبوردتاردى الىپ تاستاۋ كەزىندە قىزمەت بابىن اسىرا پايدالاندى دەگەن ايىپتاۋى. باۋىرجان بايبەكتىڭ زاڭگەرى ايجان تاشەنوۆا اۋەزوۆ اۋداندىق №2 سوتىندا ءوتىپ جاتقان ازاماتتىق-پروسەسسۋالدىق پروسەستە وسىلاي دەدى.

ونىڭ ايتۋىنشا، قالانىڭ كوركىن ايتارلىقتاي بۇزعان قورشاۋلاردى الىپ تاستاۋ تۋرالى باستاماعا مەگاپوليس تۇرعىندارى تۇسىنىستىكپەن قاراپ، قولداۋ بىلدىرگەن. وسىلايشا، مەنشىك يەلەرى اكىمدىكتىڭ ۇيعارىمى بويىنشا قورشاۋلارىن وزدەرى بولشەكتەپ، ولاردى وزدەرىنە قالدىرعان. مەتالل، شويىن، اعاش، بەتون جانە باسقا دا ماتەريالداردان جاسالعان قورشاۋلار بولشەكتەلدى.

– كوممۋنالدىق مەنشىك نىساندارىنىڭ بولشەكتەلگەن قورشاۋلارىنىڭ ءبىر بولىگى مەكتەپتەر، بالاباقشالار جانە باسقا دا نىسانداردىڭ اينالاسىنداعى جارامسىز قورشاۋلاردى اۋىستىرۋ كەزىندە پايدالانىلدى. پايدالانۋعا جارامسىز شاعىن بولىگى قالالىق پوليگونعا شىعارىلدى. الىنعان قورشاۋلاردىڭ ءبىر بولىگى "الماتى تازالىق" مكك-دا بولدى. مۇنىڭ ءبارى قالانى اباتتاندىرۋ ماقساتىندا جاسالدى جانە باق-تا بەلسەندى تۇردە جاريالاندى، – دەدى ا.تاشەنوۆا.

زاڭگەر ءبىر كەزدەرى الماتىنىڭ كوشەلەرى وتە ۇلكەن، كوزگە قوراش جارناما تاقتالارىنان كوز اشپاي قالعانىن ايتا كەلە، 2015 جىلعى قاراشادا الماتى قالاسى ءماسليحاتىنىڭ №381 شەشىمىمەن جارنامالىق كونسترۋكسيالاردىڭ جاڭا ۇلگىلەرى مەن ولشەمدەرىن رەتتەيتىن قالانى اباتتاندىرۋ ەرەجەلەرىنە وزگەرىستەر ەنگىزىلگەنىن العا تارتتى.

سوتتىڭ 2016 جىلعى شەشىمىمەن الماتىنى اباتتاندىرۋ ەرەجەلەرىنە ءتيىستى وزگەرىستەر زاڭدى دەپ تانىلدى.

– كاسىپكەرلەرگە 2016 جىلدىڭ 1 ساۋىرىنە دەيىن بيلبوردتاردى اتالعان تالاپتارعا سايكەس كەلتىرۋگە مۇمكىندىك بەرىلدى. 5 اي – بيلبوردتاردى اۋىستىرۋ ءۇشىن جەتكىلىكتى ۋاقىت. كوپتەگەن كومپانيالار وسى كەزەڭدى پايدالانىپ، بيلبوردتارىن جاڭارتتى. الايدا، كەيبىر كاسىپكەرلەر بۇل مۇمكىندىكتى پايدالانباي، سول ارقىلى ءماسليحات قابىلداعان ەرەجەنى بۇزدى، – دەدى زاڭگەر.

ادۆوكات ەرەجەگە باعىنباعانداردىڭ ءبىرى رەتىندە "Prior Print" كومپانياسىن اتادى. اكىمدىك اتالعان كومپانياعا 9 اي ىشىندە ەرىكتى تۇردە كەمشىلىكتەردى جويۋ ءۇشىن شارالار قابىلداۋ تۋرالى بىرنەشە رەت حات جولداعان. الايدا ولاردىڭ تاراپىنان ەشقانداي ارەكەت جاسالماعانىن، وسىدان سوڭ زاڭ بۇزۋشىلارعا قاتىستى زاڭناماعا سايكەس ءتيىستى شارا قابىلدانعانىن اتاپ ءوتتى.

– مۇندا دا ماماي ادەتتەگىدەي كوپشىلىكتى شاتاستىرۋ ءۇشىن ءبارىنىڭ ءوڭىن تەرىس اينالدىرۋدا. جالپى، بۇل جەردە باۋىرجان بايبەكتىڭ 2 جىلدان بەرى الماتى قالاسىنىڭ اكىمى بولىپ جۇمىس ىستەمەيتىنىن، دەگەنمەن، ونىڭ تۇسىندا ەنگىزىلگەن بارلىق باستامالار قالا مەن ونىڭ تۇرعىندارىنا ءالى دە پايداسىن تيگىزىپ وتىرعاندىعىن باسا ايتقىم كەلەدى. ەگەر ولار زاڭسىز بولسا، تۇرعىندار قولداماس ەدى جانە قالانىڭ دامۋىنا ىقپال ەتپەس ەدى، وندا ولاردى الماتىنىڭ جاڭا باسشىلىعى تەرىستەپ، جالعاستىرماعان بولار ەدى، – دەدى ا.تاشەنوۆا.