بۇگىن پارلامەنت ءماجىلىسى جەتىنشى شاقىرىلىمىنىڭ العاشقى سەسسيا جۇمىسى قورىتىندىلاندى.

ءماجىلىس ءتوراعاسى نۇرلان نىعماتۋلين پالاتانىڭ جالپى وتىرىسىندا وسى سەسسيا ءوز جۇمىسىن ەل اۋەلسىزدىگىنە 30 جىل تولعان تاريحي كەزەڭدە باستاعانىن العا تارتتى.

– وسى سەسسياداعى جاڭا جانە ناقتى قادامدار ءماجىلىستىڭ زاڭ شىعارۋ جۇمىسىن ودان ءارى كۇشەيتۋگە جول اشتى. سونىڭ ناتيجەسىندە، ءماجىلىس ساياسي، الەۋمەتتىك، ەكونوميكالىق ماڭىزى زور كوپتەگەن زاڭداردى قابىلدادى. كوپتەگەن پارلامەنتتىك شارالار ۇيىمداستىرىلدى. بۇل جولدا ءبىز، ەلباسى نۇرسۇلتان ءابىش ۇلى نازاربايەۆتىڭ ستراتەگيالىق باستامالارىن جانە مەملەكەت باسشىسى قاسىم-جومارت كەمەل ۇلى توقايەۆتىڭ العا قويعان مىندەتتەرىن باسشىلىققا الدىق. ونىڭ بارلىعى، حالقىمىزدىڭ ءومىر ساپاسىن ارتتىرۋعا، ەلىمىزدىڭ تۇراقتى دامۋىن زاڭ دەڭگەيىندە قامتاماسىز ەتۋگە ىقپال ەتتى، – دەدى ول.

نۇرلان نىعماتۋلين اتاپ وتكەندەي، سەسسيا بارىسىندا دەپۋتاتتار وزدەرىنىڭ زاڭ شىعارۋشىلىق باستامالارىن بەلسەندى قولدانىپ، 10 زاڭ جوباسىن ازىرلەپ شىققان. 

وسى سەسسيادا 230-دان اسا دەپۋتاتتىق ساۋال جولدانعان. ولار يندۋستريالىق-يننوۆاسيالىق دامۋ، قارجى، ءبىلىم بەرۋ، دەنساۋلىق ساقتاۋ، الەۋمەتتىك قورعاۋ جانە ايماقتىق دامۋ ماسەلەلەرىنە باعىتتالدى. 

سونداي-اق پالاتا سپيكەرى سەسسيا اياقتالعانىمەن دەپۋتاتتار وڭىرلەرگە، شالعايداعى اۋىلدىق جەرلەرگە بارىپ سايلاۋشىلارمەن كەزدەسەتىنىن ايتتى. 

ءماجىلىستىڭ باسپا ءسوز قىزمەتى