پرەزيدەنت قاسىم-جومارت توقايەۆ نۇر-سۇلتان قالاسىنداعى تۇرعىن ءۇي كەشەنىندەگى ليفتتە مونيتوردى شاققان ماس ەر ادامنىڭ ارەكەتىنە پىكىر ءبىلدىردى. بۇل تۋرالى اقوردا سايتى حابارلادى.

– جۋىردا ەلوردادا ماس ادام ليفتتەگى مونيتوردى سىندىرعانى ءۇشىن وعان 14 مىڭ تەڭگە عانا ايىپپۇل سالىنعان. بۇلاي بولمايدى. مۇنداي ىس-ارەكەت ءۇشىن كەمىندە 15 تاۋلىككە قاماۋ كەرەك نەمەسە 1 جىلعا تۇزەتۋ جۇمىستارىنا سالۋ جونىندە جازا كەسۋ قاجەت. مۇنداي جاعدايلارعا مۇلدەم توزبەۋ كەرەك. جەڭىل جازا جارامايدى. ال ءىس جۇزىندە جازالاماۋ سالدارى قۇقىق بۇزۋشىلىق پەن قىلمىستىڭ ودان ءارى ورشۋىنە الىپ كەلەدى. سوندىقتان وسى ماسەلە بويىنشا زاڭنامانى قاتاڭداتۋ كەرەك، – دەدى پرەزيدەنت.

بۇعان دەيىن الەۋمەتتىك جەلىدە ەلوردادا ليفت كابيناسىنا ورناتىلعان مونيتوردى سىندىرعان ەر ادامنىڭ ۆيدەوسى تاراعان. ارتىنشا ەر ادام ماس كۇيدە بولعانى انىقتالدى. وعان قاتىستى قوعامدىق ءتارتىپتى بۇزعانى ءۇشىن اكiمشiلiك قۇقىق بۇزۋشىلىق تۋرالى زاڭنامانىڭ 434-بابى بويىنشا اكىمشىلىك ءىس قوزعالىپ، 5 اەك (14585 تگ) كولەمىندە ايىپپۇل سالىنعان.