ءبىلىم جانە عىلىم ءمينيسترى اسحات ايماعامبەتوۆ تامىز ايىنا دەيىن تۇلەكتەردىڭ ۇبت تاپسىرۋ كەزىندەگى بەينەجازباسى تەكسەرىلەتىنىن ايتتى. ول بۇل تۋرالى مينيسترلىكتىڭ اپپارات جينالىسىندا مالىمدەدى.
– بيىل ۇبت-عا 145 مىڭنان استام تالاپكەر قاتىستى. ولار ۇبت-نى ەكى مارتە تاپسىرۋعا مۇمكىندىك الدى. مەنىڭ ويىمشا بيىل بۇرىن سوڭدى بولماعان قولايلى جاعداي جاسالدى. بالالارعا ىڭعايلى فورمات بولدى. ەندى تامىز ايىنا دەيىن بارلىق كامەرالار بويىنشا، زەردەلەۋ جاساۋ كەرەك. ەگەردە تاۋەكەلدەر بايقالسا، وندا ءتيىستى شەشىم قابىلداۋىمىز كەرەك. وتكەن جىلى مۇنداي جۇمىستى العاش رەت جۇرگىزگەن ەدىك. سوندا ءبىز بەكىتىلگەن تالاپتارعا سايكەس ءوزىن ۇستاماعان، ەرەجەلەردى بۇزعان ءبىراز تالاپكەردىڭ ناتيجەسىن جويدىق، – دەدى مينيستر.
ايماعانبەتوۆ قانداي وقۋشىلاردىڭ بەينەجازباسى بولەك قارالاتىنىن اتاپ ءوتتى.
– مىسالى بيىل ناۋرىزدا تۇلەكتەر سىناما تەست تاپسىردى. سول سىناما تەستىلەۋدىڭ باللى مەن ۇبت باللى اراسىندا 20 باللدان كوپ اۋىتقۋ بولسا، وندا وسىنداي اۋىتقۋ بار بارلىق بالانىڭ بەينەجازباسىن بولەك قارايمىز. ۇلكەن زەرتتەۋ وتكىزەمىز.
سونىمەن قوسا بيىل ۇبت-عا وقۋشىلاردى دايىنداۋعا مۇعالىمدەر قاتىسپادى. بۇرىن كەزەكشى ەتۋ ءۇشىن 3 مىڭنان استام ءمۇعالىمدى ەلدىڭ تۇكپىر-تۇكپىرىنە جەبەرەتىنبىز. ولاردىڭ قوناق ۇيلەرىنە قارجى كەتەتىن. بيىل وسى 3 مىڭ ۇستاز ەشقايدا جىبەرىلمەدى. ۇبت تاپسىراتىن ورتالىقتاردىڭ جەرگىلىكتى فيليالدارىن دا ازايتۋ قاجەت. تەك قانا ەڭ ماڭىزدى ورتالىقتار جۇمىس ىستەيتىن بولادى. ەلەكتروندىق فورماتكا كوشكەننەن كەيىن مۇنداي قاجەتتىلىك جوق، – دەدى مينيستر.
پىكىر قالدىرۋ