2021 جىلعى قىركۇيەك ايىندا بارلىق مەكتەپكە دەيىنگى ءبىلىم بەرۋ ۇيىمدارىندا، مەكتەپتەردە، كوللەدجدەردە، ارنايى جانە اسكەري جوعارى وقۋ ورىندارىندا مەملەكەتتىك اتتەستاسيا باستالادى. بۇل تۋرالى ءبىلىم جانە عىلىم  مينيسترلىگى حابارلادى.

– مەملەكەتتىك اتتەستاسيا پروفيلاكتيكالىق باقىلاۋ ۇلگىسىندە وتكىزىلەدى. نەگىزگى ماقسات جالپىعا مىندەتتى مەملەكەتتىك ءبىلىم بەرۋ ستاندارتىنىڭ تالاپتارىن ورىنداۋ شارالارىن قاداعالاۋ. سونداي-اق ءبىلىم بەرۋ ۇيىمدارىنا ادىستەمەلىك كومەك بەرىلەدى، – دەدى ءبىلىم سالاسىنداعى ساپانى قامتاماسىز ەتۋ دەپارتامەنتىنىڭ باسشىسى گۇلنار ەرمەكبايەۆا. 

اتتەستاسيالىق كوميسسيا ءبىرىڭعاي رەسپۋبليكالىق رەەسترگە كىرەتىن ساراپشىلاردىڭ ءتىزىمى نەگىزىندە جاساقتالادى. ال تەكسەرىستىڭ ءوزى قاشىقتان وتەدى. ساراپشىلار ءبىلىم بەرۋ ۇيىمىنا بارمايدى. ولار ءبىلىم بەرۋ ۇيىمدارى جىبەرگەن قۇجاتتاردىڭ ەلەكتروندىق نۇسقاسى نەگىزىندە ءوز باعاسىن بەرەدى.

– اتاپ ايتقاندا، وقۋشىلاردىڭ ءبىلىم دەڭگەيى باعالانادى، كەشەندى تەستىلەۋ وتكىزىلەدى. اتا-انالار اراسىندا ساۋالناما ۇيىمداستىرىلادى. سونداي-اق ءبىلىم بەرۋ ۇيىمدارىنا وز-وزىنە باعا بەرۋگە مۇمكىندىك جاسالادى.

بۇل – حالىقارالىق تاجىريبە. ول دا باقىلاۋدىڭ ءبىر مەحانيزمى، ونداي شارا ءبىلىم بەرۋ ۇيىمىنىڭ دەربەستىگىن ىنتالاندىرۋعا، سونداي-اق، ءبىلىم بەرۋ جۇمىسىن جەتىلدىرۋگە باعىتتالعان، –دەدى گۇلنار ەرمەكبايەۆا.

وقۋشىلاردىڭ ءبىلىمىن باعالاۋ اياسىندا تەستىلەۋ جۇرگىزىلەدى. باستاۋىش سىنىپتاردا – ەكى ءپان، نەگىزگى ورتاشا ءبىلىم ءۇشىن ءۇش ءپان، ال جالپى ورتا ءبىلىم الۋشىلارى ءتورت ءپان بويىنشا تەست تاپسىرادى.

كاسىبي-تەحنيكالىق ءبىلىم بەرۋ ۇيىمدارىندا ەكى سالالىق ءپان بويىنشا تەستىلەۋ ۇيىمداستىرىلادى. ال مەكتەپكە دەيىنگى ءبىلىم بەرۋ جانە تاربيەلەۋ اياسىندا اتا-انالار اراسىندا ساۋالناما جۇرگىزىلەدى.

مينيسترلىك وكىلى بەس جىلدىڭ ىشىندە بارلىق ءبىلىم بەرۋ ۇيىمى بالاباقشا، مەكتەپ، كوللەدج، ارنايى جانە اسكەري جوعارى وقۋ ورىندارى دا مەملەكەتتىك اتتەستاسيادان وتەتىنى جوسپارلانىپ وتىرعانىن ايتتى.