نۇر-سۇلتان قالاسىنىڭ COVID-19 ينفەكسياسىنا قارسى ۆاكسيناسيالانعان ەكى تۇرعىنى iPhone12 تەلەفونىن ۇتىپ الدى. بۇل تۋرالى astana.gov.kz سايتى حابارلادى.
سايت مالىمەتىنشە، ەلوردا اكىمدىگى COVID-19 ينفەكسياسىنا قارسى ۆاكسيناسيالانعاندار اراسىندا iPhone12 تەلەفونىنىڭ ەكى داناسىنى، سول سياقتى ءتۇرلى دەمەۋشىلەر سىيلىقتارىنىڭ ۇتىس وينىن وتكىزگەن.
"ءبىرىنشى ۇتىس وينىنا ۆاكسيناسيا باستالعان ساتتەن باستاپ 6 شىلدەگە دەيىن ەكپە سالدىرعاندار قاتىستى. ونىڭ بارىسىندا 259 مىڭ 115 ادام ۆاكسينا سالدىردى.
ەلوردا اكىمدىگى جازدىڭ سوڭىنا دەيىن اپتا سايىن iPhone12 تەلەفونىنىڭ ەكى داناسىن ۇتىسقا قويادى. وسىلايشا جالپى سانى 20 iPhone سمارتفونى ۇتىسقا قويىلادى" دەلىنگەن حابارلامادا.
ايتا كەتەيىك، ەلوردادا ازاماتتاردى ۆاكسيناسيالاۋعا ىنتالاندىرۋ ءۇشىن باعالى سىيلىقتاردىڭ ۇتىس ويىندارى ۇيىمداستىرىلىپ جاتىر.
بۇعان دەيىن نۇر-سۇلتان قالاسىنىڭ اكىمى التاي كولگىنوۆ ۇتىسقا ەكى بولمەلى پاتەر قويىلعانىن حابارلاعان. وعان وسى جىلدىڭ 25 ماۋسىمى مەن 31 تامىزى ارالىعىندا ۆاكسينانىڭ ءبىرىنشى كومپونەنتىن قابىلداعان 18 جاستان اسقان قالا تۇرعىندارى قاتىسا الادى. اتالعان ۇتىس وينىنا بارلىق ساۋدا ۇيلەرى مەن مەديسينالىق مەكەمەلەردە ۆاكسينا سالدىرعاندار قاتىسادى. اكىمدىك ۇتىس وينى دەمەۋشىلەردىڭ كومەگىمەن جۇرگىزىلەتىنىن ايتادى.
