25 جاستاعى شاكيلا زارين ءسوزى مەن بەتى ارقىلى اۋعان ايەلدەرى قۇقىعىنىڭ وكىلى بولعىسى كەلەتىنىن ايتادى. ول ەرتە تۇرمىسقا شىعىپ، كۇيەۋىنەن قورلىق كورگەن. اقىرىندا كۇيەۋى تاپانشامەن بەتىنەن اتىپ، 22 وتادان كەيىن زورعا امان قالعان. العان جاراقاتىنىڭ سالدارىنان بۇگىندە سول جاق بەتى قيسايىپ كەتكەن.
شاكيلا زارين اۋعانستاننىڭ سولتۇستىگىندەگى باگلان پروۆينسياسىندا تۋعان. ول وتكەن ءومىرىن قاتتى قينالىسپەن ەسكە الادى. بالالىق شاعى اۋىر بولعان. بالا سەكىلدى ويناپ كۇلگەن كەزى ەسىندە جوق. كىشكەنتايىنان اعالارى، جەزدەسى ۇنەمى تاياقتاسا، تۇرمىسقا شىققان سوڭ كۇيەۋى ۇدايى قول كوتەرگەن.
17 جاسىندا كۇشتەپ وزىنەن جاسى ۇلكەن ەر ادامعا تۇرمىسقا شىعارىلعان. كەلىن بولىپ تۇسە سالىسىمەن كۇيەۋى ۇراتىنىن مەڭزەپ "سەن وسىعان لايىقسىڭ" دەپ قولدان جاسالعان قامشىنى كورسەتكەن. شاكيلا ءزاريننىڭ "ءبىزدىڭ قانداي كىنامىز بار، ءبىزدى نەگە ۇرادى" دەگەنىنە كۇيەۋى "ايەلدەر قالاي عانا بىزگە قارسى شىعىپ، سويلەيتىن بولعان" دەپ اشۋلانعان.
بىردە شاكيلا ءزاريننىڭ پوليسيا ۋچاسكەسىنە بارعانىن ءبىلىپ قويعان كۇيەۋى ونى بەتىنەن تاپانشامەن اتقان. شاكيلا زارين 22 وتا جاساتىپ، ايلاپ اۋرۋحانادا جاتادى. ول بۇل سۇمدىقتىڭ ءبارى ءتۇس ەكەن دەپ ويلاپ، تەزىرەك ءبىتۋىن تىلەيدى. ءبىراق اۋرۋحانا توسەگىندە ويانعاندا اناسىنىڭ جىلاپ وتىرعانىن كورىپ، مۇنىڭ ءبارى ءتۇس ەمەستىگىن تۇسىنگەن. "بۇل مەنىڭ ءومىرىمنىڭ ءبىر بولىگى" ەدى دەيدى ول.
باسىنان وتكەن جاعدايعا قاراماستان شاكيلا زارين ءوزىن جولى بولعان ادام دەپ سانايدى. ول اۋعانستانداعى ايەلدەر وتە قيىن جاعدايدا ءومىر ءسۇرىپ وتىرعانىن، ءوزىنىڭ سوزدەرى مەن العان جاراقاتىنان كەيىن قيسايعان بەتى ارقىلى اۋعان ايەلدەرىنىڭ قۇقىعىنا وكىلدىك ەتىپ، ولاردى قورعاعىسى كەلەتىنىن جەتكىزەدى.
شاكيلا زارين ءقازىر كانادادا تۇرىپ جاتىر.
اۋعانستان ايەلدەن قۇقىعى ساقتالمايتىن ەلدەر قاتارىنا جاتادى. بىلتىر ايەلدەرگە قارسى زورلىق-زومبىلىقتىڭ 3500 رەسمي دەرەگى راستالعان. بەلگىلى ەمەسى قانشاما... ەلدەگى قاۋىپسىزدىك جاعدايى ناشارلاعان سايىن مۇنداي دەرەكتەر ارتۋى ىقتيمال دەگەن ءقاۋىپ باسىم.
دەرەككوز: BBC
پىكىر قالدىرۋ