قوستاناي وبلىسىنا قاراستى توبىل وڭىرىندە 3 ادام "ءسىبىر" جاراسىن جۇقتىرعان. بۇل تۋرالى استانا ارناسى حابارلادى.
اۋرۋدى جەرگىلىكتى سەرىكتەستىكتىڭ جۇمىسشىلارى جۇقتىرعانى انىقتالدى. دارىگەرلەر قازىرگى ۋاقىتتا جاعدايلارى تۇراقتى ەكەنىن ايتتى.
ۆەتەريناريا باسقارماسىنىڭ باسشىلىعى دەنيسوۆ اۋدانىنداعى جاۋاپكەرشىلىگى شەكتەۋلى سەرىكتەستىك اۋماعىنا كارانتين ەنگىزىلگەنىن مالىمدەدى. ونداعى 10-نان استام ءىرى قارانىڭ ولەكسەسى ارنايى پەشتەردە ورتەلىپ، قورا-قوپسى زالالسىزداندىرىلعان. قالعان تۇلىكتىڭ بارىنە ۆاكسينا سالىنعان. باسقا ەلدى-مەكەندەردەگى ەپيزووتيالىق جاعداي تۇراقتى ەكەنىن اتاپ ءوتتى.
– شارۋاشىلىق ءوزى جەكە ورنالاسقان. ماڭايىندا ەشقانداي جاقىن ەلدىمەكەن جوق. جەكە سەكتورلاردىڭ دا مالى جوق. سوندىقتان جاڭاعى دياگنوز انىقتالعاننان كەيىن ۆەتەريناريا باسقارماسىنىڭ باسشىلىعىمەن جانە قاداعالاۋىمەن دەنيسوۆ اۋدانىنداعى ۆەتەريناريا ستانسياسى قاجەتتى ءىس-شارالاردى اتقاردى. ءبىزدىڭ بولجام بويىنشا ءسىبىر جاراسىنىڭ قوزدىرعىشىن جىرتقىش اڭ، قۇستار سوسىن كەمىرگىشتەر باسقا جاقتان اكەلۋى ابدەن مۇمكىن، – دەدى قوستاناي وبلىستىق ۆەتەريناريا باسقارماسى باسشىسىنىڭ ورىنباسارى باۋىرجان بەكەت.
پىكىر قالدىرۋ