جامبىل وبلىسىنىڭ اكىمى بەردىبەك ساپاربايەۆ حالىققا ەسەپ بەرۋ كەزدەسۋى كەزىندە مىنبەردەگى ەلتاڭبانىڭ قۇلاۋ وقيعاسىنىڭ ءمان-جايىن ءتۇسىندىردى.

– بىزدە ءبىر نارسەنى تاۋىپ الادى دا، قويمايدى سوسىن. مەن بىلاي ايتار ەدىم: "ساپاربايەۆ پاتريوت ەمەس" دەيدى عوي مىسالى. مەن سول ادامعا: "سەن پاتريوت بولىپ قازاقستانعا نە ىستەدىڭ؟ ءوزىڭنىڭ ۇلتىڭا نە ىستەدىڭ، ايتشى؟ ناعىز پاتريوتسىڭ، سويلەگەندە قاتىراسىڭ" دەر ەدىم. مەن 30 جىلدا كىشكەنە ەڭبەك ەتكەن شىعارمىن. بىرىنشىدەن، قازاق رەتىندە، ەكىنشىدەن، قازاقستان ازاماتى رەتىندە.

ال ەلتاڭباعا بايلانىستى ايتار بولسام، ۇستىمە ءبارىن قويىپ قويدى (پەتليچكا-رەد). مەن ارعى جەردە ەسەپ بەرىپ تۇرمىن. بىرەۋ سۇراق قويدى. ءبىر ۋاقىتتا ءبىر نارسە سالدىر-گۇلدىر ەتە قالدى. سوسىن مەن جىگىتتەرگە "مىنانى الساڭدارشى" دەدىم. مەن ونى ەلتاڭبا ەكەنىن بىلگەن جوقپىن، الدىمدا (مىنبەردىڭ الدىندا-رەد) تۇر عوي، مەن بەرگى جاعىندا تۇرمىن. مەن وعان بارۋ ءۇشىن مىنانىڭ ءبارىن شەشۋىم كەرەك. ءسويتىپ بارۋىم كەرەك. ونى كوتەردى، قاراسام ەلتاڭبا. وعان ءمان بەرگەن جوقپىن، ارى قاراي جالعاسىپ كەتتى، – دەدى ساپاربايەۆ جۋرناليست نارتاي ارالبايۇلىنا بەرگەن سۇحبات بارىسىندا. 

بەردىبەك ساپاربايەۆ 19 اقپان كۇنى ونلاين فورماتتا حالىققا ەسەپ بەرىپ تۇرعان كەزدە ىڭعايسىز جاعدايعا تاپ بولعان. تىكەلەي ەفيردە اكىم تۇرعىندار تاراپىنان كەلىپ تۇسكەن سۇراقتارعا جاۋاپ بەرىپ جاتقاندا مىنبەرگە جەلىمدەلگەن ەلتاڭبا كەنەت وزىنەن-وزى جەرگە قۇلاپ تۇسكەن. ءسويتىپ ەدى ساپاربايەۆ قول استىنداعى قىزمەتكەرلەرىنە "السايشى انانى" دەپ بۇيىرا سويلەدى دە، سۇراقتارعا جاۋاپ بەرۋىن جالعاستىرعان. بۇل وقيعا الەۋمەتتىك جەلىدە قىزۋ تالقىعا ءتۇستى. كەي قولدانۋشىلار ساپاربايەۆتىڭ جەكىپ سويلەۋى قازاقستان بيلىگىندەگى باستىق پەن ونىڭ قولاستىنداعىلارى اراسىنداعى قارىم-قاتىناستى بۇكپەسىز كورسەتتى دەپ سانايدى.