تاۋەلسىز قازاقستانداعى العاشقى ءىرى بيزنەسمەندەردىڭ ءبىرى بولات ءابىلوۆ ءتول ۆاليۋتا – تەڭگە قولدانىسقا ەنگىزىلگەنگە دەيىن قازاقستان رۋبلگە تاۋەلدى بولىپ، ەكونوميكا قاتتى زارداپ شەككەنىن ايتتى.

كاسىپكەر ەكونوميكا ءۇشىن قيىن شاق 1993 جىلعى تامىزدا تۋعانىن ەسكە الدى.

– 1991، 1992 جىلدارى ءبارى جاقسى ەدى. تەك ديەۆالۆاسيا سۇمدىق بولاتىن. جاعداي 1993 جىلعى تامىزدا قيىنداي باستادى. بوريس ەلسين (رەسەيدىڭ سول كەزدەگى پرەزيدەنتى – رەد) تامىزدىڭ باسىندا ەكى اپتادان كەيىن ءرۋبلدىڭ ەركىن اينالىمى باسقا ەلدەر اۋماعىندا توقتاتىلاتىنىن ايتتى. ول كەزدە ءرۋبلدى قازاقستان مەن تاجىكستان (رەسەيدەن بولەك - رەد) قولداناتىن. وسى كەزدە قازاقستان ەكونوميكاسى قاتتى زارداپ شەكتى، كوپتەگەن قاتەلىكتەرگە جول بەرىلدى. ەلسين مالىمدەمەسىنەن كەيىن رەسەي ەسكى ءرۋبلدى قابىلداۋدى باس تارتىپ، جاڭا ءرۋبلىن شىعاردى. ال ەسكىسىن جويۋى كەرەك بولعان. ءبىراق ولار ولاي ەتپەي، ۇشاقپەن ەسكى ءرۋبلدى قازاقستان اۋماعىنا الىپ كەلىپ، ءبىز دوللارعا ساتىپ العان تاۋاردى جوق اقشاعا، كادىمگى قاعازعا الىپ كەتتى. سپورتتىق كيىم كيگەن جىگىتتەر سومكە-سومكە ەسكى اقشامەن كەلىپ، ءبىزدىڭ تاۋاردى ساتىپ الاتىن. سول قىركۇيەك، قازان ايلارىندا قازاقستاننان ميللياردتاعان تاۋار كادىمگى قاعازعا، وتىرىك اقشاعا جىلىستاپ كەتتى. شەشىمنىڭ (قازاقستاننىڭ ءتول ۆاليۋتاسىن شىعارۋ تۋرالى شەشىم – رەد) ۇزاق قابىلدانعانىنا تاڭمىن. ۇلتتىق ۆاليۋتا قولدانىسقا ەنگەن 1993 جىلعى 15 قاراشا – مەن ءۇشىن ناعىز تاۋەلسىزدىك سيمۆولى. تاۋەلسىزدىكتى جاريالاعان 16 جەلتوقساندا ەمەس، ءانۇران، ەلتاڭبا، تۋ قابىلدانعاندا ەمەس، ولار بار بولعانىمەن قولمەن ۇستاپ، سەزىنە المايسىڭ، تەڭگە قولدانىسقا ەنگەن 15 قاراشادا عانا بيزنەسمەن، ادام رەتىندە تاۋەلسىزدىكتى سەزىندىم. قارجىلىق ساياساتىمىزدى، التىن-ۆاليۋتا قورىمىزدى جۇرگىزىپ، ماسكەۋ، كرەمل نە ايتادى ەكەن دەپ جالتاقتاماي ءومىر ءسۇرۋ باستالعاندا عانا مەن تاۋەلسىزدىكتىڭ نە ەكەنىن سەزدىم، – دەدى ءابىلوۆ مەدياكاسىپكەر ارمانجان بايتاسوۆقا بەرگەن سۇحباتتار سەرياسى بارىسىندا.

قازاقستان تاۋەلسىز ەل بولىپ جاريالاعان 1991 جىلعى 16 جەلتوقساننان ەكى جىلعا جۋىق ۋاقىت وتكەننەن كەيىن ءوزىنىڭ ۇلتتىق ۆاليۋتاسىن قولدانىسقا ەنگىزگەن. وعان دەيىن كەڭەس وداعىنىڭ ءرۋبلى قولدانىلىپ كەلدى. 

سونداي-اق قازاقستان ەگەمەندىك تۋرالى دەكلاراسيانى كەڭەس ۇكىمەتىنە ەنگەن ەلدەر اراسىندا سوڭعىلاردىڭ ءبىرى بولىپ جاريالاعان. كەي ساراپشىلار مۇنى سول كەزدەگى بيلىكتەگىلەردىڭ ساياسي جالتاقتىعىمەن، ماسكەۋدىڭ قاس-قاباعىن اڭدىپ، سولاردىڭ ايتقانىنان شىعا الماعانىمەن، وداقتى ساقتاپ قالۋعا تىرىسقانىمەن بايلانىستىرادى.