پرەزيدەنت قاسىم-جومارت توقايەۆ دەنساۋلىق ساقتاۋ ءمينيسترى الەكسەي سويدىڭ ەسەبىن تىڭدادى. بۇل تۋرالى پرەزيدەنتتىڭ باسپا ءسوز حاتشىسى بەرىك ءۋالي facebook پاراقشاسىندا حابارلادى.
مينيستر پرەزيدەنتكە قازىرگى ەپيدەميولوگيالىق جاعداي، ەكپە ەگۋ جۇمىستارىنىڭ بارىسى جانە ەلگە ۆاكسينا جەتكىزۋ جونىندەگى ۋاعدالاستىقتار تۋرالى بايانداعان.
قاسىم-جومارت توقايەۆقا ءبىرقاتار وڭىردە كارانتين شارالارىنىڭ كۇشەيتىلگەنى، جۇقپالى اۋرۋلار ستاسيونارلارى مەن جانساقتاۋ بولىمدەرىندە ەم قابىلداپ جاتقان ناۋقاستار سانى، دارى-دارمەكتەر مەن باسقا دا قاجەتتى جابدىقتار قورى، ۆاكسينا سالۋ قارقىنى باياۋ وڭىرلەرگە كورسەتىلىپ جاتقان ادىستەمەلىك كومەك جايىندا مالىمەت بەرىلدى.
الەكسەي سويدىڭ ايتۋىنشا، ماۋسىم ايىنداعى جاعدايمەن سالىستىرعاندا شىلدەنىڭ سوڭعى ەكى اپتاسىندا ىندەت جۇقتىرعانداردىڭ سانى 4،8 ەسەگە كوبەيگەن. كۇندەلىكتى جۇرگىزىلگەن مونيتورينگ بويىنشا 24 شىلدەدەگى مالىمەتكە سايكەس، جۇقپالى اۋرۋلار بولىمدەرىنىڭ 51 پايىزىندا، جانساقتاۋ بولىمدەرىنىڭ 41 پايىزىندا ناۋقاستار ەم قابىلداپ جاتىر. ۆيرۋس جۇقتىرعاندار سانىنىڭ كوبەيۋىنە جانە دەنساۋلىق ساقتاۋ جۇيەسىنە تۇسكەن سالماقتىڭ ارتۋىنا بايلانىستى شىلدە ايىندا قوسىمشا 10 مىڭ توسەك-ورىن ازىرلەنگەن. قازىرگى ۋاقىتتا 21،4 مىڭعا جۋىق ورىن رەزەرۆتە تۇر.
سونىمەن قاتار دەنساۋلىق ساقتاۋ ءمينيسترى پرەزيدەنتكە الەمدە كوروناۆيرۋس ىندەتىنىڭ جاڭا "ليامبدا" شتامىنىڭ پايدا بولۋى مەن تارالۋى تۋرالى ايتتى. بۇل ۆيرۋس العاش رەت 2020 جىلعى جەلتوقساندا پەرۋدە تىركەلگەن. بۇگىندە ىندەتتىڭ وسى ءتۇرىن 30 مەملەكەتتە، نەگىزىنەن سولتۇستىك جانە وڭتۇستىك امەريكا مەن ەۋروپا ەلدەرىندە 3 مىڭعا جۋىق ادام جۇقتىرعان.
قاسىم-جومارت توقايەۆ الەكسەي سويعا ەلدەگى ەپيدەميولوگيالىق احۋالدى قاتاڭ باقىلاۋدا ۇستاۋدى، جاپپاي ەكپە سالۋ قارقىنىن ارتتىرۋدى، ناۋقاستارعا ۋاقىتىلى مەديسينالىق كومەك كورسەتۋ جۇمىستارىن، سونىڭ ىشىندە العاشقى مەديسينالىق-سانيتارلىق جاردەمدى ساپالى ۇيىمداستىرۋدى تاپسىردى.
پىكىر قالدىرۋ