پرەزيدەنت قاسىم-جومارت توقايەۆ يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆتىڭ ەسەبىن تىڭدادى. بۇل تۋرالى پرەزيدەنتتىڭ باسپا ءسوز حاتشىسى بەرىك ءۋالي facebook پاراقشاسىندا حابارلادى.

پرەزيدەنت توقايەۆقا مەملەكەتتىك باعدارلامالاردىڭ جۇزەگە اسىرىلۋ بارىسى مەن يندۋستريا جانە ينفراقۇرىلىمدىق دامۋ مينيسترلىگىنىڭ بيىلعى جارتىجىلدىقتاعى جۇمىستارىنىڭ نەگىزگى باعىتتارى تۋرالى باياندالعان.

بەيبىت اتامقۇلوۆتىڭ ايتۋىنشا، ءوندىرىس سالاسىندا جىل باسىنان بەرگى ءوسىم كورسەتكىشى 5،6 پايىزعا، سونىڭ ىشىندە، فارماسيەۆتيكا 31 پايىزعا، ماشينا جاساۋ سالاسى 22 پايىزعا، حيميا 2،8 پايىزعا جانە مەتاللۋرگيا 0،8 پايىزعا ارتقان.

بۇدان بولەك جىل سوڭىنا دەيىن قاسىمشا 126-دان استام جوبا ىسكە قوسىلادى. بۇل جوبالارعا 1،1 تريلليون تەڭگە كولەمىندە ينۆەستيسيا سالىنعان.

توقايەۆقا "نۇرلى جول" باعدارلاماسى اياسىندا جىل باسىنان بەرى ۇزىندىعى 2،2 مىڭ شاقىرىم اۆتوموبيل جولدارى پايدالانۋعا بەرىلگەنى جونىندە باياندالدى. ترانزيتتىك جۇك تاسىمالى ارتىپ كەلەدى، سونىڭ ىشىندە، جۇڭگو – ەۋروپا – جۇڭگو باعىتى بويىنشا بۇل كورسەتكىش 59 پايىزعا وسكەن.

"نۇرلى جەر" باعدارلاماسى بويىنشا بۇگىندە 6،6 ميلليون شارشى مەتر تۇرعىن ءۇي پايدالانۋعا بەرىلگەن. جىل سوڭىنا دەيىن بۇل كورسەتكىشتى 17 ميلليون شارشى مەترگە دەيىن جەتكىزۋ جوسپارلانىپ وتىر.

اڭگىمەلەسۋ سوڭىندا قاسىم-جومارت توقايەۆ ۆەدومستۆو جۇمىسىنىڭ نەگىزگى باعىتتارى بويىنشا تاپسىرما بەردى. ول جەرگىلىكتى قاتىناس جولدارىن دامىتۋ جانە قايتا جوندەۋ جۇمىستارىن، سونداي-اق جالعا بەرىلەتىن تۇرعىن ۇيلەردىڭ قۇرىلىسىن ماڭىزدى مىندەتتەر رەتىندە اتاپ ءوتتى.