دزيۋدودان توكيو وليمپياداسىنىڭ قولا جۇلدەگەرى اتانعان ەلدوس سمەتوۆ ەكىنشى مەدالىنە قاتىستى ويىمەن ءبولىستى. بۇل تۋرالى Olympic.kz سايتى حابارلادى.

– شىنى كەرەك، مەن قولا ەمەس، التىن الامىن دەپ كەلدىم. ريو وليمپياداسىنان كەيىن تاتاميدەن الىستاپ كەتپەي، ۇلكەن سپورتتا قالۋىمنىڭ دا ءبىر سەبەبى وسى ەدى. كۇمىستەن كەيىن التىن العىم كەلدى. ەلىمىزدىڭ ءانۇرانىن شارىقتاتىپ، كوك بايراعىمىزدى بيىكتەن كورۋدى ارماندادىم. سول ءۇشىن تىنباي ەڭبەك ەتتىم دە. ءبىراق ماعان بۇيىرىپ تۇرعانى قولا جۇلدە ەكەن، – دەدى ە. سمەتوۆ. 

دزيۋدوشى جارتىلاي فينالداعى جەكپە-جەگى وتە تارتىستى وتكەنىن اتاپ ءوتتى.

– مەن بارىمدى سالدىم. سپورتقا ارناعان وسىنشا جىلداعى بار ونەرىمدى، بار كۇشىمدى بۇگىن توكيو تاتاميىنە تاستاپ شىقتىم. بويىمدا كۇرەسكە دەگەن قانداي قاسيەت بولسا، سونىڭ ءبىرىن دە اياپ قالمادىم. جارتىلاي فينالداعى جەكپە-جەكتى كوردىڭىزدەر. وتە تارتىستى ءوتتى. قايتا-قايتا شابۋىلعا يەك ارتىپ، قارسىلاسىمدى تۇقىرتۋعا تىرىستىم. الايدا، جەڭىس بۇگىن مەنىڭ جاعىمدا ەمەس ەكەن.

ءيا، جاپوندىق بالۋان ناوحيسا تاكاتو مەنىمەن كەزدەسۋگە فينالدىق بەلدەسۋگە شىققانداي دايىندىقپەن كەلدى. ونىڭ فينالعا جانە وعان دەيىنگى جەكپە-جەكتەرگە قالاي دايىندالعانىن كوردىم. جارتىلاي فينالعا ەرەكشە اسەرمەن بەتتەدى. ەكەۋمىز تالاي مارتە كەزدەسىپ ءجۇرمىز. ءبىر-بىرىمىزدى جاقسى بىلەمىز. بۇگىنگى بەلدەسۋدىڭ تىم ۇزاققا سوزىلعانىنىڭ سەبەبى دە وسى.

2020 جىلدىڭ باسىندا ءبىز ناعىز بابىمىزدا بولدىق. الايدا، الەمدەگى پاندەميا سالقىنىن تيگىزدى. 8-9 اي بويى بىردە-بىر جارىسقا قاتىسقان جوقپىز. دەسە دە، بۇل كۇندەردىڭ ءبارى ارتتا قالدى، قيىندىقتىڭ ءبارىن جەڭىپ شىقتىق. سوعان قۋانامىن، – دەپ جەكپە-جەكتەن كەيىنگى اسەرىن ايتتى.