بۇگىن كوروناۆيرۋستىق ينفەكسيانىڭ تارالۋىنا جول بەرمەۋ جونىندەگى ۆاك وتىرىسىندا نۇر-سۇلتان، الماتى، شىمكەنت، اتىراۋ، قاراعاندى قالالارىندا كارانتين شارالارىن كۇشەيتۋ تۋرالى شەشىم قابىلداندى.
بۇل ايماقتاردا 2 تامىزدان باستاپ تومەندەگىدەي شەكتەۋ شارالارى كۇشىنە ەنەدى:
- ورتالىق مەملەكەتتىك ورگانداردى، اكىمدىكتەردى، قۇقىق قورعاۋ ورگاندارىن، دەنساۋلىق ساقتاۋ ۇيىمدارىن، باق-تى، ازىق-تۇلىك دۇكەندەرىن، ءدارىحانالاردى جانە تىرشىلىكتى قامتاماسىز ەتۋ ۇيىمدارىن قوسپاعاندا، "Ashyq" جوباسىنا قاتىسپايتىن بارلىق كاسىپورىندار مەن ۇيىمداردىڭ قىزمەتىن توقتاتا تۇرۋ؛
- ويىن-ساۋىق، سپورتتىق، وتباسىلىق، ەستەلىك جانە وزگە دە بۇقارالىق ءىس-شارالاردى وتكىزۋگە تىيىم سالۋ؛
- مەملەكەتتىك ورگاندار، كەڭسەلەر، ۇلتتىق كومپانيالار مەن وزگە دە ۇيىمدار قىزمەتكەرلەرىنىڭ 80%-ىن قاشىقتان جۇمىس تارتىبىنە اۋىستىرۋ (ۆاكسينا سالدىرعانداردى جانە سوڭعى 3 اي ىشىندە اۋىرىپ جازىلعانداردى قوسپاعاندا).
سونداي-اق اقمولا، الماتى، قاراعاندى وبلىستارىنىڭ اكىمدىكتەرىنە نۇر-سۇلتان (بۋراباي، سەلينوگراد، ارشالى اۋداندارى)، الماتى (قاراساي، تالعار، ىلە، ەڭبەكشىقازاق اۋداندارى)، شىمكەنت (سايرام، تولەبي اۋداندارى)، قاراعاندى قالالارىمەن (تەمىرتاۋ، شاحتينسك، اباي) شەكارالاس اۋدانداردا كارانتين شارالارىن كۇشەيتۋ بويىنشا شارالار قابىلداۋ ۇسىنىلدى.
وڭىرلەردىڭ اكىمدىكتەرىنە شەكتەۋلەر ەنگىزۋ جانە ولاردىڭ ساقتالۋىن باقىلاۋ بويىنشا بارلىق شارالاردى قابىلداۋ تاپسىرىلدى.
سونداي-اق باس مەملەكەتتىك سانيتار دارىگەردىڭ 2021 جىلعى 14 شىلدەدەگى №32 قاۋلىسىنا سايكەس 10 تامىزعا دەيىنگى مەرزىمدە قىزمەت كورسەتۋ سالاسىنىڭ بارلىق قىزمەتكەرلەرى كوۆيد-19 ۆاكسيناسىنىڭ ءبىرىنشى كومپونەنتىن سالدىرۋعا ءتيىس.
پىكىر قالدىرۋ