باقىتجان ساعىنتايەۆتىڭ تاپسىرماسى بويىنشا الماتى قالاسى اكىمىنىڭ ورىنباسارى ەرجان باباقۇماروۆ مەگاپوليستەگى ەپيدەميولوگيالىق احۋالدىڭ ناشارلاۋى سالدارىنان كوروناۆيرۋس ينفەكسياسىنىڭ تارالۋىنىڭ الدىن الۋ جونىندەگى قالالىق شتابتىڭ جۇمىس كەڭەسىن وتكىزدى.

كەڭەسكە قالالىق قوعامدىق دەنساۋلىق باسقارماسىنىڭ باسشىسى ن. تابىنبايەۆ، اۋماقتىق سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى، مەگاپوليستىڭ مەملەكەتتىك باس سانيتارلىق دارىگەرى ج. بەكشين، اۋداندىق اكىمدىكتەر مەن بەيىندى باسقارمالاردىڭ وكىلدەرى قاتىستى.    

باستى ماقسات – ينفەكسيانىڭ تارالۋىنا قارسى كۇرەستىڭ قوسىمشا شارالارىن قابىلداۋ جانە مۋتاسيالانعان COVID-19 شتاممىنىڭ اينالىمىن ەسكەرە وتىرىپ، مەديسينالىق قىزمەتكە مۇقتاج پاسيەنتتەر سانىنىڭ ارتۋىنا وراي دەنساۋلىق ساقتاۋ جۇيەسى ينفراقۇرىلىمىنىڭ دايىندىعىن قامتاماسىز ەتۋ.  

بۇگىندە الماتىدا 86 مىڭنان استام كۆي جۇقتىرعان جاعداي تىركەلگەن، ونىڭ ىشىندە سوڭعى تاۋلىكتە تىركەلگەندەر سانى - 993 جاعداي. سونىمەن بىرگە، تاۋلىك سايىن 400-دەن استام ناۋقاس اۋرۋحاناعا جاتقىزىلۋدا، بۇل ەمدەلىپ شىققاندار سانىنان 2 ەسە كوپ. COVID-19-پەن 3099 پاسيەنت ستاسيونارلىق ەمدەلۋدە جاتۆر، ال رەانيماسيا مەن ينتەنسيۆتى تەراپيادا 228 ناۋقاس جاتىر.  

اكىمنىڭ ورىنباسارى ەرجان باباقۇماروۆ شىلدە ايىنىڭ باسىنان بەرى رەانيماسيا بولىمىندە جاتقان ناۋقاستار سانىنىڭ ءۇش ەسەگە ارتقانىن، ءۇي كارانتينىندەگى پاسيەنتتەردىڭ ديناميكاسى (5821 ناۋقاس) وتكەن ايدا 6 ەسەگە وسكەنىن اتاپ ءوتتى. بارلىق ينفەكسيالىق ستاسيونارلاردا توسەك ورىنداردىڭ جۇكتەمەسى 50%-دان اسادى. سوندىقتان تامىز-قىركۇيەك ايلارىنا ارنالعان بولجامدى جاعدايلاردى جانە قالاداعى اۋرۋلاردىڭ قارقىنى مەن دەڭگەيىن ەسكەرە وتىرىپ، قالادا رەزەرۆتىك ينفەكسيالىق توسەكتەرگە قاجەتتىلىكتى انىقتاۋ تاپسىرىلدى (قولدانىستا 6 090 توسەك-ورىن بار) جانە ولاردى پايدالانۋدى باستاۋ قاجەت.  

سونىمەن بىرگە، كادر رەزەرۆىن قامتاماسىز ەتۋ جانە ولاردى كوۆيدتى تەراپياعا ۇيرەتۋ، ۆاكسيناسيا ءتولقۇجاتتارىنىڭ قولدان جاسالۋىمەن كۇرەسۋ جانە الدىن-الۋ بويىنشا نۇسقاۋلار بەرىلدى.

  كوروناۆيرۋس ينفەكسياسىنىڭ تارالۋىنىڭ الدىن الۋ جونىندەگى قالالىق شتاب الماتىلىقتاردى قورعانىس شارالارىن – بەتپەردە رەجيمىن، الەۋمەتتىك قاشىقتىقتى قاتاڭ ساقتاۋعا، ادامدار كوپ جينالاتىن ورىندارعا بارماۋعا، سونىمەن قاتار ۆاكسينالانۋ ماسەلەسىن كەيىنگە قالدىرماۋعا شاقىرادى، ويتكەنى بۇل ينفەكسيادان قورعاۋدىڭ جالعىز ءادىسى.