بەلارۋستىڭ ەكى جاتتىقتىرۋشىسى "سپورتشىنى توكيوداعى ويىنداردان كەتۋگە ماجبۇرلەدى" دەگەن ايىپپەن وليمپيادالىق اككرەديتاسيادان ايىرىلدى.
حالىقارالىق وليمپيادا كوميتەتى (حوك) ارتۋر شيماك پەن يۋريي ماييەۆيچتىڭ وليمپيادا اۋىلىنان كەتكەنىن راستادى. ءقازىر تەرگەۋ جۇرگىزىلۋدە.
بەلارۋس سپورتشىسى كريستينا تيمانوۆسكايا بۇكىل الەمنىڭ نازارىن اۋداردى. ول بەلارۋس شەنەۋنىكتەرىن سىنعا العان سوڭ، اۋەجايعا ءماجبۇرلى تۇردە اپارىلعانىن ايتادى. اۋەجايدا ول جاپون پوليسياسىنىڭ قورعاۋىنا الىندى.
سپورتشى ءقازىر پولشادا. وعان گۋمانيتارلىق ۆيزا بەرىلدى.
بەلارۋس بيلىگى ونىڭ ەموسيونالدى جاعدايىنا بايلانىستى ۇلتتىق قۇرامادان شىعارىلعانىن مالىمدەدى. ءبىراق 24 جاستاعى قىز بۇل شىندىققا جاناسپايتىنىن ايتادى. ول Instagram-دا "جاتتىقتىرۋشىلارىنىڭ نەمقۇرايلىلىعى" تۋرالى ايتقاندىقتان ۇلتتىق قۇرامادان شىعارىلعانىن جەتكىزدى.
حوك مالىمدەمەسىندە ەكى جاتتىقتىرۋشىنىڭ اككرەديتاسياسىن الىپ تاستاۋ "ۋاقىتشا شارا" ەكەنىن، "ءالى دە توكيودا جۇرگەن بەلارۋس ۇلتتىق وليمپيادالىق كوميتەتى سپورتشىلارىنىڭ اماندىعى ءۇشىن" ىستەلىپ جاتقانىن جاريالادى.
پىكىر قالدىرۋ