ءبىلىم جانە عىلىم مينيسترلىگى كوللەدجدەرگە قۇجات قابىلداۋ ناۋقانى جالعاسىپ جاتقانىن حابارلادى. بۇگىنگى تاڭدا تالاپكەرلەردەن 126 074 ءوتىنىش بەرىلگەن. 

مينيسترلىكتىڭ مالىمەتىنە سۇيەنسەك، بيىل 97 مىڭ ءبىلىم گرانتى بولىنگەن. سونىمەن قاتار تەگىن ءبىلىم العىسى كەلەتىندەر ءۇشىن كۆوتالىق ساناتتار ءتىزىمى كەڭەيتىلگەن. كوپبالالى وتباسىلاردان شىققان بالالار ءۇشىن 5%، مارتەبەسى كەمىندە ءۇش جىل تولىق ەمەس وتباسىلار قاتارىنداعى بالالارعا 1%، مۇمكىندىگى شەكتەۋلى بالالاردى تاربيەلەپ وتىرعان وتباسىلاردان شىققان بالالار ءۇشىن 1% كۆوتا قوسىلعان. ەگەر دە باللدار تەڭ بولعان جاعدايدا كۆوتالىق سانات جانە اتتەستاتتىڭ ورتاشا بالى ەسكەرىلەدى.

تالاپكەرلەر كوللەدجگە قۇجاتتاردى ەكى تاسىلمەن ەلەكتروندىق ۇكىمەت پورتالى Egov.kz ارقىلى نەمەسە تىكەلەي كوللەدجگە بارىپ تاپسىرادى.

بولاشاق ستۋدەنتتەر ءتورت ماماندىق پەن ءتورت كوللەدجگە دەيىن تاڭداي الادى. قابىلداۋ ءراسىمى جاڭا ەرەجەلەرگە سايكەس جۇزەگە اسىرىلادى. بيىل پەداگوگيكالىق، مەديسينالىق جانە شىعارماشىلىق ماماندىقتاردى قوسپاعاندا، قابىلداۋ ەمتيحاندارى بولمايدى.

ەستەرىڭىزگە سالا كەتەيىك، مەملەكەتتىك تاپسىرىس "اقشا ستۋدەنتپەن بىرگە جۇرەدى" قاعيداتى بويىنشا بولىنەتىن بولادى. ياعني، ەگەر بۇرىن ءبىلىم باسقارمالارى گرانتتاردى كوللەدجدەر اراسىندا بولگەن بولسا، ەندى ولار كوللەدجدەر اراسىندا تالاپكەرلەردىڭ تاڭداۋى بويىنشا بەرىلەدى.

كونكۋرس اتتەستاتتاعى مىندەتتى جانە بەيىندىك پاندەردەن قويىلعان باعانىڭ ورتاشا بالى بويىنشا وتكىزىلەدى.

– بايقاۋ بىرنەشە كەزەڭگە بولىنگەن. 29 شىلدە مەن 2 تامىز ارالىعىندا – شىعارماشىلىق ماماندىقتار، 16-19 تامىز ارالىعىندا – پەداگوگيكالىق ماماندىقتار بويىنشا. 9-سىنىپ نەگىزىندە وقۋعا تۇسەتىن تالاپكەرلەر اراسىندا مەملەكەتتىك تاپسىرىستى ءبولۋ 19-22 تامىز ارالىعىندا، ال 11 سىنىپ تۇلەكتەرى ءۇشىن 22-25 تامىز ارالىعىندا وتەدى. مەملەكەتتىك تاپسىرىس بويىنشا وقۋعا قابىلداۋ تۋرالى اقپارات تالاپكەردىڭ جەكە كابينەتىنە كەلەدى، – دەدى بعم تەحنيكالىق جانە كاسىپتىك ءبىلىم دەپارتامەنتى ديرەكتورىنىڭ ورىنباسارى ەرنات ءجۇنىسوۆ.

ەسكە سالا كەتەيىك، قۇجاتتاردى قابىلداۋ 25 ماۋسىمدا باستالىپ، 18 تامىزعا دەيىن جالعاسادى.