شىمكەنت قالاسىندا تۇرعىن ءۇي كەزەگى كەلگەن 74 ازاماتقا جالدامالى پاتەر كىلتى تابىستالدى. ونىڭ ىشىندە 28 پاتەر - كوپبالالى وتباسىلارعا، 39 پاتەر - حالىقتىڭ الەۋمەتتىك جاعىنان ءالسىز توپ مۇشەلەرىنە، 7 پاتەر - جەتىم جانە اتا-اناسىنىڭ قامقورلىعىنسىز قالعان بالالار ساناتىنداعى ازاماتتارعا بەرىلدى.
اتالعان كوپقاباتتى تۇرعىن ۇيلەر تۇران، تۇرلان، اسار-2 شاعىن اۋداندارىنان بولىنگەن. جالدامالى باسپانامەن قامتىلعانداردىڭ قاتارىندا قالا تۇرعىنى فاريدا ءجۇنىسوۆا دا بار. ول 2014 جىلى تۇرعىن ۇيگە مۇقتاج ازاماتتار كەزەگىنە كوپبالالى وتباسىلار ساناتى بويىنشا كەزەككە تىركەلگەن.
قالا تۇرعىنى وسى ۋاقىتقا دەيىن تۇرعىن ءۇي كەزەگىن ۇنەمى ەگوۆ ەلەكتروندىق پورتالى ارقىلى باقىلاپ وتىرعان. كوپبالالى انا 7 جىلعا جۋىق ۋاقىت بويى تۇرعىن ءۇي كەزەگىن سابىر ساقتاپ، شىدامدىلىق تانىتىپ كۇتكەن. بۇگىندە جالدامالى باسپاناعا قول جەتكىزگەن وتباسىنىڭ قۋانىشىندا شەك جوق.
ايتا كەتۋ كەرەك، وسى جىلدىڭ ءساۋىر ايىندا تۇرعىن ۇيگە مۇقتاج ازاماتتار كەزەگىندە تۇرعان 161 ازاماتقا ساتىپ الۋ قۇقىعىنسىز جالدامالى پاتەر قولدانىسقا بەرىلسە، مامىر ايىندا 147 ارەندالىق باسپانا تۇرعىندار يگىلىگىنە تابىستالعان بولاتىن. سونىمەن بىرگە جىل باسىندا 300 پاتەر جۇمىس ىستەيتىن جاستارعا ۇلەستىرىلگەن ەدى. ال، جىل سوڭىنا دەيىن 294 ازاماتتىڭ پاتەرمەن قامتىلۋى جوسپارلانۋدا.
ايتا كەتەيىك، 2020 جىلى تۇرعىن ءۇي كەزەگىندەگى 1596 ازامات ارەندالىق باسپاناعا قول جەتكىزگەن بولسا، 904 پاتەر جۇمىس ىستەپ جۇرگەن جاستارعا بەرىلگەن بولاتىن.
پىكىر قالدىرۋ