الماتىداعى ناۋرىزباي اۋدانى "شۇعىلا Sity" (340/4) ىقشاماۋدانىنداعى كوپقاباتتى ۇيلەردىڭ بىرىندە  ءورت شىقتى. "قامشى" رەداكسياسىنا حابارلاسىپ، كومەك سۇراعان تۇرعىندار جاڭا سالىنعان كوپقاباتتى ءۇيدىڭ ءبىرقاتار ولقىلىقتارىنا اكىمدىك نازار اۋدارماي وتىرعانىن جەتكىزدى.

وقىس وقيعا 13 تامىز كۇنى بولعان.  كۋاگەرلەر ءورتتىڭ شىعۋىنىڭ بىرنەشە سەبەبى بار دەپ سانايدى. ايتۋلارىنشا، كوپقاباتتى ۇيلەردە گاز بالوندى قولدانۋ، ەلەكتر توقتارىنىڭ اۋىرلىعى، پاتەرلەردىڭ گازبەن قامتاماسىز ەتىلمەۋى وقىس جاعداي سەبەبى بولۋى ىقتيمال.

قامشى رەداكسياسىنا شاعىمدانعان تۇرعىندار كوپقاباتتى ءۇيدىڭ وزگە دە ءبىرقاتار پروبلەمالارىن ايتتى.

– ناۋرىز ايىنان باستاپ كوپپاتەرلى ءۇيدى پايدالانۋعا بەردى. سول ايدان باستاپ كەلدىك. ءبىراق ءبىز ۇيگە كىرگەندە جوندەۋ جۇمىستارى ءالى اياقتالماعان ەدى. تەك جارىق پەن سۋ عانا قوسىلعان. گاز اتىمەن جوق. مامىر ايىنىڭ اياعىنا دەيىن ءبىتىرىپ بەرۋگە ۋادە ەتكەن. الايدا ارادا 6 اي ءوتتى. ەشتەڭە جاسالمادى. بىردە جوندەۋ جۇمىستارى جۇرگىزىلەدى دەپ 20 كۇن ىستىق سۋدى وشىرگەن. كەيىن 25 كۇن دەگەندە ارەڭ قوستى. ونىڭ وزىندە سۋ ساپ-سارى، تازا ەمەس، – دەيدى نارازى تۇرعىندار.  

نىسان قۇرىلىسىن جۇرگىزگەن "تيمۋس-Construction" كومپانياسىنا ءتۇرعىنۇي قۇرىلىس جيناق بانكى ارقىلى باسپانالى بولعان 660-قا جۋىق ادامنىڭ دا ايتارى بار.

– بىزگە كونكۋرستان وتكەننەن كەيىن پاتەرلەردى كورسەتۋى كەرەك بولعان. ءبىراق كومپانيا كورسەتپەي، ماڭايىنا جولاتپاي قويدى. ەندى بۇل پروبلەمالاردى اكىمدىك مەردىگەر ۇيىمعا، مەردىگەر ۇيىم اكىمدىككە سىلتەيدى. ءبارىبىر اكىمدىك تاراپىنان جاۋاپ بولۋ كەرەك، – دەيدى اۋدان تۇرعىندارى.