اۋعانستان استاناسى كابۋلعا تاليبان كۇشتەرى كىرگەننەن كەيىن ەلدە بەيبەرەكەت باستالدى. قالادان كەتكىسى كەلگەن حالىق كابۋل اۋەجايىندا جاپپاي جينالىپ جاتىر. بۇل تۋرالى Son Dakika باسىلىمى حابارلادى.
اۋعانستان ۇكىمەتىمەن قاقتىعىستا جەڭىسكە جەتكەن تاليبان كۇشتەرى 15 تامىز كۇنى كابۋلعا كىرگەن. پرەزيدەنت سارايىن باسىپ العان تاليبان كۇشتەرى "بەيبىت تۇرعىندارعا تيىسپەيمىز" دەگەن مالىمدەمەسىنە قاراماستان، مىڭداعان ازامات قالادان كەتكىسى كەلەدى. ولار ءتۇرلى كەدەرگىلەرگە تاپ بولۋدا.
تاليبان قوزعالىسىنىڭ باسقىنشىلىعىنا بايلانىستى كوپتەگەن ەلدەر ءوز ازاماتتارى مەن ەلشىلىك قىزمەتكەرلەرىن ەۆاكۋاسيالاۋدى جالعاستىرۋدا. ەۆاكۋاسيا جۇمىستارى جۇرگىزىلگەن كەزدە، اۋەجايدا بارلىق رەيستەر توقتاتىلدى. بەيبەرەكەت كەزىندە بىرنەشە ادامنىڭ قايتىس بولعانى حابارلاندى.
اۋەجايداعى حاوس ساتتەرىنىڭ كادرلارىن تۇسىرگەن كۋاگەردىڭ ايتۋىنشا، شەنەۋنىكتەر مەن قارت ادامداردى جاسىرىن تۇردە ۇشاققا وتىرعىزىپ جاتقانى تۋرالى قاۋەسەت تاراعان. مۇنى ەستىگەن ادامدار اۋەجايعا قاراي جۇگىرە باستاعان.
ۇشاققا وتىرعىزۋ كەزىندە ۇلكەن كەپتەلىس بولدى. سول ساتتە قاۋىپسىزدىك كۇشتەرى ادامداردىڭ اۋەجايعا كىرۋىنە جول بەرمەۋ ءۇشىن اسپانعا وق اتقان.
اۋعانستانداعى وقيعادان كەيىن بۇۇ-نىڭ نيۋ-يوركتەگى شتاب-پاتەرى عيماراتىنىڭ الدىندا نارازىلىق اكسياسى وتۋدە. اۋعان دياسپوراسىنىڭ 100-دەن استام وكىلى "اۋعاندىقتاردىڭ ءومىرى ماڭىزدى" جانە "اۋعاندىقتاردى ءولتىرۋدى توقتاتىڭىز" دەپ ۇرانداتىپ شىقتى.
ولار "تاليباننىڭ" بيلىككە كەلۋىنە قارسى شىعىپ، اۋعانستاننان كەلگەن بوسقىندار ءۇشىن اقش شەكاراسىن اشۋدى سۇراۋدا.
پىكىر قالدىرۋ