Nur Otan پارتياسى ءتوراعاسىنىڭ ءبىرىنشى ورىنباسارى باۋىرجان بايبەكتىڭ زاڭگەرى ايجان تاشەنوۆا جانبولات ماماي مەن ينگا يمانبايدى باسقالاردى قارالاۋ ارقىلى وزدەرىنىڭ دەسترۋكتيۆتى قىزمەتىن جالعاستىرۋدا دەپ ايىپتادى.
– وسى ۋاقىت بويى ماماي مەن يمانبايەۆا باسقالاردى قارالاۋ ارقىلى وزدەرىنىڭ دەسترۋكتيۆتى قىزمەتىن جالعاستىرۋدا. ولاردىڭ بەينەماتەريالدارى ءبىرجاقتى ايىپتاۋشى سيپاتقا يە. سونداي-اق ولاردى قىلمىستىق ءىس ءۇشىن دايىن ماتەريال دەپ سانايدى، – دەدى تاشەنوۆا.
سونداي-اق ايجان تاشەنوۆا "ج.ماماي مەن ي.يمانبايدىڭ اپەللياسيالىق شاعىمى جالعان دەرەكتەردەن، بىلىكسىزدىك پەن ەكىجۇزدىلىكتەن تۇرادى" دەيدى.
ال بەلسەندى جانبولات ماماي اپپەلياسيالىق سوت وتىرىسىنان سوڭ facebook-تە "مانتيا كيگەن بيلىكتىڭ نوتاريۋسى بايبەكتىڭ مۇددەسىن قورعادى" دەپ جازبا جاريالاپ، "سوت وزدەرىنىڭ كەلتىرگەن دەرەكتەرى مەن دالەلدەرىن كوزگە ىلمەدى" دەپ مالىمدەدى. سونداي-اق ول اپپەلياسيالىق سوت شەشىمىمەن كەلىسپەيتىنىن، جوعارى سوتقا، ودان كەيىن بۇۇ ادام قۇقىعى كوميتەتىنە شاعىمداناتىنىن جازدى.
ب.بايبەك-ج.ماماي تەكەتىرەسى بەلسەندىلەردىڭ كوكتەمدە NurOtan پارتياسى ءتوراعاسىنىڭ ءبىرىنشى ورىنباسارى تۋرالى ەكى تىلدە فيلم جاريالاۋىنان باستالعان. بەلسەندىلەر فيلمدە UZUN Qulaq تەلەگرام كانالىندا، اشىق دەرەككوزدەردە، ءبىرقاتار باسپا ءسوز بەتتەرىندە جاريالانعان اقپاراتتار مەن دەرەكتەردى نەگىزگە الىپ، ب.بايبەكتى الماتى اكىمى بولىپ تۇرعاندا "بيۋدجەت اقشاسىن "جەپ" ميللياردەر اتاندى" دەپ ايىپتاعان. ب.بايبەك بۇعان جاۋاپ رەتىندە بەلسەندىلەردى سوتقا بەرىپ، ءوزىنىڭ ار-نامىسىن زاڭ اياسىندا قورعايتىنىن مالىمدەگەن. الماتى قالاسى اۋەزوۆ اۋداندىق №2 سوتىندا وتكەن ازاماتتىق-پروسەسسۋالدىق پروسەستە سۋديا رايحان سارتايەۆا باۋىرجان بايبەكتىڭ پايداسىنا شەشىم شىعارعان. بەلسەندىلەر ۆيدەوروليكتەردى ينتەرنەتتەن وشىرۋگە، سونداي-اق سوت شىعىندارىن وتەۋگە مىندەتتەلگەن. سۋديا "بەلسەندىلەر فيلمدەگى ايىپتاۋلارعا بىردە-بىر دالەل ۇسىنبادى، فيلمدەگى مالىمەتتەر شىندىققا جاناسپايدى" دەپ مالىمدەگەن. بەلسەندىلەر كەلتىرىلگەن دالەلدەردى سۋديا قابىلداماعانىن ايتىپ، "سوتتىڭ ماتەريالداردى ءوشىرۋ تۋرالى شەشىمى ورىندالمايتىنىن" حابارلاعان. ارتىنشا اپەللياسيالىق سوتقا شاعىم تۇسىرگەن.
پىكىر قالدىرۋ