"تاليبان" قوزعالىسىنىڭ شابۋىلى قايتا قارقىن الىپ، اۋعانستانداعى احۋالدىڭ ناشارلاۋىنا قاراماستان، اقش پرەزيدەنتى دجو بايدەن بۇل ەلدەن امەريكا اسكەرىن اكەتۋ تۋرالى شەشىمىنە وكىنبەيتىنىن ايتتى، دەپ حابارلادى Gazeta.ru.

جۋرناليستەرمەن وتكەن كەزدەسۋ بارىسىندا اق ءۇي باسشىسى قۇراما شتاتتار اۋعان كۇشتەرىنە اۋەدەن قولداۋ كورسەتىپ، قاجەتتى جاراقتارمەن قامتاماسىز ەتۋدى ارى قاراي دا جالعاستىرا بەرەتىنىن جەتكىزدى.

– ءبىز 20 جىلدا تريلليون دوللاردان اسا قاراجات جۇمسادىق. 300 مىڭنان استام اۋعان ساربازىن وقىتىپ، زاماناۋي جابدىقتارمەن جاراقتادىق.

ولار تالىپتەردەن سان جاعىنان دا باسىم. سوعان قاراماستان ءبىز ءوز مىندەتتەمەلەرىمىزدى ارى قاراي ورىنداي بەرمەكپىز. ءبىراق اسكەردى اكەتۋ تۋرالى شەشىمىمە ەش وكىنبەيمىن، – دەدى اقش پرەزيدەنتى.

اقش پەن ناتو اۋعانستاننان اسكەرىن شىعارا باستاعاننان بەرى جاعداي ۋشىعىپ، تالىپتەر ءىرى قالالارعا شابۋىلىن كۇشەيتتى.

15 تامىز كۇنى قارۋلى توپتار كابۋلداعى پرەزيدەنت سارايىنا باسىپ كىردى. پرەزيدەنت اشراف گاني اۋعانستاننان قاشىپ، ونىڭ قاي جەردە ەكەنى ءالى بەلگىسىز.

ال 16 تامىز كۇنى "تاليبان" قوزعالىسىنىڭ رەسمي وكىلى ەلدە 20 جىلعا سوزىلعان سوعىس اياقتالىپ، جۋىق ارادا جاڭا باسقارۋ فورماسى جاريالاناتىنىن مالىمدەدى.