تۇركىستان وبلىسى قوستوبە اۋىلىنداعى مەكتەپ اپاتتى جاعدايدا تۇر. بۇل تۋرالى 31 تەلەارنا حابارلادى. 

تۇرعىنداردىڭ سوزىنشە، وسىدان 10 جىل بۇرىن سوعىلعان مەكتەپكە 200 ملن تەڭگە قارجى جۇمسالعان. الايدا ءبىلىم عيماراتىنىڭ بۇگىنگى ساپاسى سىن كوتەرمەيدى. قابىرعالارى جارىلىپ، سىلاقتارى ءتۇسىپ، ەدەن وپىرىلىپ تۇسۋگە شاق تۇر.  ال 1 قىركۇيەك بولسا جاقىنداپ كەلەدى.

– ءبىزدىڭ بالالارىمىز مۇندا قالاي وقيدى؟ مەكتەپتى سوققان مەردىگەر كەپىلدىك مەرزىمى اياقتالدى دەپ، ساپاعا جاۋاپ بەرمەيدى. مەكتەپ 150 وقۋشىعا ارنالعان، ءبىز بالالارىمىزدى جىبەرۋگە قورقامىز، –  دەيدى قوستوبە اۋىلىنىڭ تۇرعىنى تاستان قۋاتبەكوۆ. 

ال اۋداندىق ءبىلىم باسقارماسىنىڭ وكىلى، ءبارى اتا-انالار ايتقانداي قورقىنىشتى ەمەس، تەك مەكتەپ اسحاناسى مەن "ب" كورپۋسى جوندەۋدى قاجەت ەتەدى دەيدى. 

– مەكتەپكە كۇردەلى جوندەۋ جۇرگىزۋ ءۇشىن جوبالىق-سمەتالىق قۇجاتتامانى دايىنداپ، 6 ملن 939 مىڭ تەڭگە ءبولۋ تۋرالى وبلىستىق باسقارماعا ءتيىستى حات جولدادىق، – دەدى تولەبي اۋدانى ادامي الەۋەتتى دامىتۋ ءبولىمىنىڭ مامانى پەرنەبەك اسانوۆ.

اۋداندىق ءبىلىم ءبولىمى، عيماراتتى 2022 جىلى تولىعىمەن جوندەلەتىنىن ايتتى. دەسە دە جاڭا وقۋ جىلىندا بالالار مەكتەپكە بارادى. ال اتالعان ب كورپۋسى جوندەۋ اياقتالعانعا دەيىن جابىق تۇرادى.