شىمكەنت قالاسىنىڭ اكىمى مۇرات ايتەنوۆ كەزەكتى رەت تىكەلەي ەفيرگە شىعىپ، تۇرعىندار سۇراقتارىنا جاۋاپ بەردى.

ەفير بيىلعى مامىر ايىندا قولدانىسقا ەنگىزىلگەن مەملەكەتتىك تاپسىرىس ارقىلى بالالار مەن جاسوسپىرىمدەرگە ارنالعان سپورت سەكسيالارى مەن شىعارماشىلىق ۇيىرمەلەردى جان باسىنا قارجىلاندىرۋ جۇيەسى تاقىرىبىنا ارنالدى.

مەملەكەت باسشىسىنىڭ بۇقارالىق جانە بالالار سپورتىن دامىتۋ جونىندەگى ناقتى تاپسىرماسى بار ەكەندىگىن اتاپ وتكەن قالا باسشىسى سپورتتى دامىتۋدا ماقساتتى جۇمىستار اتقارىلىپ وتىرعاندىعىن ايتتى.

بۇل باعىتتا مەكتەپتەردەگى سپورتتىق ۇيىرمەلەرگە 156 مىڭ بالا قامتىلىپ، سپورت مەكتەپتەرىندە جانە مەملەكەتتىك-جەكەمەنشىك ارىپتەستىك بويىنشا جۇمىس جۇرگىزەتىن 5 سپورتتىق ۇيىمعا 17 مىڭ بالا تارتىلعان.

سپورتتىق نىسانداردىڭ تۇرعىندارعا قولجەتىمدى بولۋىن ۇيىمداستىرۋدا شاعىناۋداندار مەن تۇرعىن الاپتاردا 115 سپورت الاڭشالارىن ورناتۋ باستاماسى قولعا الىنىپ، ىسكە اسىرىلۋدا.

قالا اكىمى پرەزيدەنت تاپسىرماسىنا سايكەس بيىلعى جىلى سپورتتىق جانە شىعارماشىلىق سەكسيالارعا جان باسىنا شاققانداعى قارجىلاندىرۋ جۇيەسى ەنگىزىلگەنىن اتاپ ءوتتى. جاڭا جوبا بويىنشا 4 جاستان 18 جاسقا دەيىنگى بالالار، ونىڭ ىشىندە ەرەكشە قاجەتتىلىگى بار بالالار مەملەكەتتىك تاپسىرىسپەن كەز-كەلگەن سپورت سەكسياسىنا، شىعارماشىلىق ۇيىرمەسىنە تەگىن بارا الادى.

جاڭا جوباعا سايكەس اتا-انالاردان سپورتتىڭ 71 ءتۇرى بويىنشا وتىنىشتەر قابىلدانادى. ءقازىر سپورتتىڭ بوكس، فۋتبول، گرەك-ريم كۇرەسى، ءجۇزۋ سپورتى، ۇستەل تەننيسى، كاراتە، تاەكۆوندو، دزيۋدو، باسكەتبول تۇرلەرى بويىنشا اتا-انالاردان 2211 ءوتىنىم تۇسكەن. جوبانى ىسكە اسىرۋعا بيىلعا 339،8 ملن تەڭگە قارالىپ، 4096 بالانىڭ سپورتتىق سەكسيالارعا بارۋىنا مۇمكىندىك بەرىلگەن.

شىعارماشىلىق ۇيىرمەلەر بويىنشا ءبىر مىڭ بالانى قامتۋعا 72 ملن. تەڭگە قارالعان. مەملەكەتتىك تاپسىرىس 13 شىعارماشىلىق باعىتتى قامتيدى. اتا-انالاردان ۇلتتىق بي، حالىق ءبيى، بالل ءبيى، دەرەكتى جانە كوركەم كينوسى، اكتەرلىق شەبەرلىك ۇيرمەلەرى بويىنشا 689 ءوتىنىم تۇسكەن.بالالارىن مەملەكەتتىك تاپسىرىس شەڭبەرىندە سپورتتىق سەكسيالار مەن شىعارماشىلىق ۇيرمەلەرگە جازدىرعىسى كەلگەن اتا-انالار artsport.edu.kz ءبىرىڭعاي ينتەگراسيالانعان ءبىلىم بەرۋ پلاتفورماسى ارقىلى ءوتىنىش قالدىرادى.

جۇيەنىڭ ەرەكشەلىگى – ءاربىر اتا-انا سپورتتىق سەكسيانى نەمەسە شىعارماشىلىق ۇيىرمەنى ءوزى تاڭداي الادى.جاتتىقتىرۋشىلاردىڭ بىلىكتىلىگىن، نىساننىڭ ورنالاسقان جەرىن تاڭداۋ مۇمكىندىگىنە يە.

تۇرعىندار تاراپىنان تۇسكەن ساۋالدارعا جاۋاپ بەرگەن قالا اكىمى بۇل جۇيە تۇراقتى بولاتىنىن جانە الداعى جىلدارى وعان بولىنەتىن قاراجات پەن بالالاردى قامتۋ كورسەتكىشى وسەتىنىن اتاپ ءوتتى.